Suedia është shpallur vendi me cilësinë më të mirë të jetesës në botë për vitin 2026, sipas një studimi të realizuar nga The Wharton School në Universitetin e Pensilvanisë, i cili analizoi 85 shtete bazuar në faktorë si ekonomia, mirëqenia sociale, investimet, stabiliteti dhe kushtet e jetesës.
Suedia mori pikët maksimale, 100 nga 100, falë sistemit të saj të fortë social, ekonomisë së zhvilluar dhe nivelit të lartë të mirëqenies. Në vendin e dytë renditet Danimarka, ndërsa podiumi plotësohet nga Kanadaja.
Studimi tregon dominimin e vendeve skandinave, pasi në dhjetëshen e parë renditen edhe Finlanda dhe Norvegjia. Nga vendet jashtë Evropës, vetëm Kanadaja dhe Australia arritën të futen në Top 10.
10 vendet me cilësinë më të mirë të jetesës në vitin 2026:
- Suedia
- Danimarka
- Kanadaja
- Zvicra
- Finlanda
- Norvegjia
- Holanda
- Australia
- Gjermania
- Belgjika
Në anën tjetër të renditjes, Ukraina u vlerësua si vendi me cilësinë më të ulët të jetesës, kryesisht për shkak të pasojave të luftës që vazhdon prej vitit 2022. Pas saj renditen Irani dhe Libani, ku konfliktet, sanksionet ekonomike dhe paqëndrueshmëria politike vazhdojnë të ndikojnë ndjeshëm në jetën e përditshme të qytetarëve.
Dhjetë vendet me cilësinë më të ulët të jetesës janë:
- Ukraina
- Irani
- Libani
- Kazakistani
- Kameruni
- Azerbajxhani
- Uzbekistani
- Gana
- Algjeria
- Bjellorusia
Studimi evidenton gjithashtu se Shtetet e Bashkuara renditen vetëm në vendin e 27-të, duke u pozicionuar më poshtë se të gjitha vendet e tjera të grupit G7. Sipas autorëve, pabarazia në të ardhura, kostot e larta të kujdesit shëndetësor, jetëgjatësia më e ulët dhe polarizimi politik ndikojnë negativisht në cilësinë e jetesës në SHBA.
Sipas studiuesve, vendet që kryesojnë renditjen kanë të përbashkët institucione të qëndrueshme, ekonomi të fortë, sisteme efikase të mbrojtjes sociale dhe akses më të mirë në shërbimet publike, elementë që ndikojnë drejtpërdrejt në mirëqenien e qytetarëve.
