Ministria e Brendshme e Mbretërisë së Bashkuar (Home Office) ka nisur t’u dërgojë letra një numri qytetarësh të Bashkimit Evropian, duke i njoftuar se leja e tyre e qëndrimit e dhënë pas Brexit ishte miratuar “gabimisht”, një zhvillim që ka ngritur shqetësime serioze për respektimin e Marrëveshjes së Tërheqjes mes Britanisë dhe BE-së.
Sipas mediave britanike, të paktën 100 persona kanë marrë deri tani njoftime të tilla, ndërsa organizatat që mbrojnë të drejtat e qytetarëve të BE-së druhen se numri real mund të arrijë në qindra ose edhe mijëra.
Shumica e të prekurve kishin përfituar statusin “pre-settled”, i cili u jepet qytetarëve të BE-së që jetonin në Britani për më pak se pesë vjet përpara përfundimit të periudhës së tranzicionit të Brexit-it. Ata prisnin që ky status të kthehej normalisht në “settled status”, që u garanton të drejtën e qëndrimit të përhershëm.
Megjithatë, Home Office po rishikon disa dosje dhe në raste të caktuara po argumenton se statusi fillestar është dhënë pa provat e nevojshme ligjore.
Një nga rastet e bëra publike është ai i një gruaje me shtetësi portugeze dhe braziliane, e cila punon në Shërbimin Kombëtar Shëndetësor (NHS) dhe po kryen studime doktorature në Britani. Ajo thotë se jeta e saj është vënë në pikëpyetje pasi autoritetet e informuan se leja e saj ishte dhënë “gabimisht”.
Në letrën zyrtare, Home Office shprehet se, bazuar në informacionin e disponueshëm, ajo nuk kishte paraqitur provat e nevojshme për të vërtetuar statusin si qytetare e BE-së deri më 31 dhjetor 2020, ndaj leja e qëndrimit konsiderohet e miratuar gabimisht.
Gruaja kundërshton këtë vlerësim, duke theksuar se ka shtetësi portugeze përmes babait të saj dhe se nuk ka fshehur asnjë informacion gjatë aplikimit.
Ajo paralajmëron se, nëse humbet të drejtën e qëndrimit, mund të humbasë vendin e punës, të mos ketë më të drejtë të marrë me qira banesë apo të përballet me probleme edhe me llogaritë bankare.
Organizata the3million, që mbron të drejtat e qytetarëve evropianë në Britani, e ka cilësuar situatën shqetësuese, duke theksuar se shumë persona kanë ndërtuar jetën e tyre në Mbretërinë e Bashkuar duke u mbështetur te vendimet e vetë autoriteteve britanike.
Ndërkohë, edhe Independent Monitoring Authority (IMA), institucioni i pavarur që mbikëqyr zbatimin e të drejtave të qytetarëve sipas marrëveshjes së Brexit-it, ka shprehur shqetësimin se kjo praktikë mund të mos jetë në përputhje me detyrimet që Britania ka marrë ndaj Bashkimit Evropian.
Home Office nuk ka bërë të ditur sa persona janë prekur nga ky proces, por ka sqaruar se ata mund të aplikojnë për forma të tjera leje qëndrimi ose të ankimojnë vendimin në rast se u refuzohet statusi i përhershëm. Gjithashtu, autoritetet kanë bërë të ditur se personat e prekur mund të qëndrojnë në Britani deri në përfundimin e vlefshmërisë së statusit të tyre aktual “pre-settled”.
Burimi: The Guardian
