Komandanti i Komandës Qendrore të SHBA-së, admirali Brad Cooper, ka vizituar aeroplanmbajtësen amerikane USS Abraham Lincoln në Detin Arabik, në një moment kur tensionet ushtarake dhe diplomatike mes Uashingtonit dhe Teheranit mbeten të larta.
Cooper u shoqërua gjatë vizitës nga i dërguari i posaçëm amerikan Steve Witkoff dhe Jared Kushner. Delegacioni u takua me ekuipazhin e aeroplanmbajtëses dhe shprehu mbështetjen dhe mirënjohjen për ushtarakët amerikanë të angazhuar në rajon.
Prania e një prej komandantëve më të lartë ushtarakë amerikanë në bordin e një aeroplanmbajtëseje në rajon përcjell një mesazh të qartë: Uashingtoni vazhdon përpjekjet diplomatike, por njëkohësisht ruan gatishmërinë ushtarake për çdo skenar.
Witkoff deklaroi se delegacioni falënderoi marinarët dhe marinsat amerikanë, ndoqi nga afër operacionet ajrore në aeroplanmbajtëse dhe u takua me pilotin që kishte rrëzuar një dron iranian që ishte afruar pranë anijes. Pala amerikane e paraqiti vizitën si një demonstrim të gatishmërisë dhe aftësisë së forcave të saj për të frenuar çdo kërcënim në rajon.
USS Abraham Lincoln është një aeroplanmbajtëse bërthamore e klasës Nimitz dhe pjesë e një grupi të fuqishëm goditës aeronaval amerikan që vepron në zonën e përgjegjësisë së CENTCOM. Grupi përfshin aeroplanmbajtësen, strukturat komanduese, një krah ajror me avionë dhe helikopterë, si dhe disa destrojerë të pajisur me raketa të drejtuara.
Vendosja e këtij grupi në Lindjen e Mesme është pjesë e një pranie më të gjerë ushtarake amerikane në rajon. Forcat e dislokuara i japin Uashingtonit mundësi të shumta veprimi, nga mbrojtja e trupave dhe interesave amerikane dhe garantimi i sigurisë së lundrimit, deri te ndërhyrja ushtarake në rast të një përshkallëzimi të situatës.
Admirali Cooper vlerësoi gjatë vizitës profesionalizmin dhe përkushtimin e personelit të Abraham Lincoln Carrier Strike Group, duke i cilësuar ato si dëshmi të gatishmërisë dhe fuqisë ushtarake amerikane në Lindjen e Mesme.
Vizita e Cooper, Witkoff dhe Kushner ilustron në këtë mënyrë qasjen aktuale të Uashingtonit ndaj Iranit: negociata nga njëra anë dhe demonstrim i fuqisë ushtarake nga ana tjetër. Fakti që ajo u zhvillua menjëherë pas bisedimeve në Oman e bën mesazhin edhe më domethënës.
Ndërsa SHBA-ja kërkon një zgjidhje diplomatike për çështjen bërthamore iraniane, prania e USS Abraham Lincoln tregon se Uashingtoni dëshiron të ruajë njëkohësisht kapacitetin për të reaguar nëse negociatat dështojnë ose situata përshkallëzohet.
Në këtë kuptim, aeroplanmbajtësja nuk është vetëm një simbol i fuqisë detare amerikane, por një element konkret i strategjisë së parandalimit të SHBA-së në Lindjen e Mesme.
Marrëdhëniet amerikano-iraniane ndodhen në një moment delikat. Përpjekjet diplomatike vazhdojnë, por paralelisht SHBA-ja po mban një prani të konsiderueshme ushtarake në rajon. Ky kombinim mes negociatave dhe fuqisë ushtarake e bën situatën rreth Iranit një çështje me rëndësi jo vetëm për Lindjen e Mesme, por edhe për sigurinë e lundrimit, tregtinë ndërkombëtare dhe tregjet globale të energjisë.
Vizita e admiralit Cooper në USS Abraham Lincoln, për këtë arsye, shkon përtej një takimi rutinë me trupat amerikane. Ajo përcjell një sinjal strategjik të qartë: Uashingtoni po negocion me Teheranin, por ndërkohë po mban të hapur edhe opsionin ushtarak.
