Puna nga distanca po ndryshon edhe mënyrën se si njerëzit zgjedhin qytetin ku duan të jetojnë. Një renditje e re e 104 qyteteve të mëdha në botë tregon se Azia është kthyer në destinacionin kryesor për nomadët dixhitalë, ndërsa Europa arrin të fusë vetëm dy qytete në dhjetëshen e parë.
Studimi i platformës së pavarur të vlerësimit të VPN-ve, vpn.jpn.com, ka marrë në konsideratë jo vetëm shpejtësinë e internetit, por edhe koston e jetesës, numrin e vendeve të përshtatshme për të punuar, mundësitë për argëtim, ofertën kulturore dhe madje edhe numrin e ditëve me mot të përshtatshëm për të punuar e jetuar rehat.
Në vendin e parë renditet Seuli, me 73.60 pikë nga 100. Kryeqyteti i Koresë së Jugut kombinon internet të shpejtë, një numër të madh ambientesh ku mund të punohet dhe një nivel çmimesh rreth 36% më të ulët se standardi amerikan i përdorur për krahasim.
Pas tij vjen Tokio, me 72.61 pikë. Kryeqyteti japonez spikat sidomos për jetën pas orarit të punës: sipas renditjes, ka përqendrimin më të madh të vendeve për dalje dhe argëtim mes qyteteve të dhjetëshes së parë.
Hanoi renditet i treti dhe ka një avantazh të fortë: çmimet janë rreth 71% më të ulëta se standardi amerikan. Kryeqyteti vietnamez ka gjithashtu përqendrimin më të madh të vendeve të përshtatshme për të punuar në Top 10, megjithëse shpejtësia e internetit është dukshëm më e ulët se në Seul apo qytetet japoneze.
Në vendin e katërt është Taipei, ndërsa i pesti është Osaka. Japonia është në fakt vendi që dominon më shumë renditjen, pasi ka tre qytete në dhjetëshen e parë: Tokio, Osaka dhe Nagoya.
Europa përfaqësohet vetëm nga Spanja. Barcelona renditet e gjashta, me 68.11 pikë, ndërsa Madridi i shtati, me 66.67 pikë. Barcelona fiton ndaj kryeqytetit spanjoll falë numrit më të madh të ambienteve për punë, kulturë dhe argëtim, por edhe motit: ka 164 ditë në vit që studimi i konsideron të përshtatshme për punë, 43 më shumë se Madridi.
Në vendin e tetë renditet São Paulo, i cili ka plot 252 ditë me kushte të favorshme klimatike, më shumë se çdo qytet tjetër në dhjetëshen e parë.
Nagoya zë vendin e nëntë, ndërsa Ho Chi Minh City mbyll Top 10. Ky i fundit spikat veçanërisht për koston e ulët të jetesës, me çmime rreth 70% më të ulëta se standardi amerikan.
Renditja tregon edhe një ndryshim interesant në hartën e punës nga distanca. Qyteti ideal për një nomad dixhital nuk është domosdoshmërisht ai me internetin më të shpejtë apo me jetesën më të lirë. Kombinimi i kostos, infrastrukturës për punë, klimës dhe jetës që ofron qyteti jashtë ekranit duket se po bëhet po aq i rëndësishëm sa vetë mundësia për të punuar online.
