Drejtori ekzekutiv i Instagram, Adam Mosseri, ka mohuar para një gjykate federale në Kaliforni akuzat se kompania ka fshehur nga publiku informacione të pafavorshme mbi ndikimin e platformës te fëmijët dhe adoleshentët, në një proces gjyqësor që mund t’i kushtojë Meta-s deri në 200 miliardë dollarë.
“Nuk po përpiqem ta inkurajoj ekipin tim të fshehë asgjë”, deklaroi Mosseri gjatë dëshmisë së tij në gjykatën e Oakland, ku disa shtete amerikane akuzojnë Meta-n se ka projektuar qëllimisht produkte që krijojnë varësi dhe që kanë dëmtuar shëndetin mendor të të rinjve, duke kontribuar në ankth, depresion dhe vetëvrasje.
Një nga çështjet e ngritura nga prokurori Jason Slothouber lidhej me funksionin “Take a Break”, të prezantuar nga Instagram për t’i nxitur adoleshentët të ndërprisnin përdorimin e platformës pas periudhave të gjata të qëndrimit online. Sipas të dhënave të përmendura në gjykatë, vetëm 1.8% e adoleshentëve e kishin aktivizuar këtë funksion, ndërsa Mosseri e kishte promovuar publikisht pa bërë të ditur këtë shifër.
Mosseri kundërshtoi idenë se kompania kishte tentuar ta fshihte përdorimin e ulët të funksionit, duke thënë se kishte deklaruar publikisht se normat e aktivizimit ishin të ulëta, edhe pse nuk ishte i sigurt nëse kishte publikuar shifrat konkrete.
Prokurori e pyeti gjithashtu për strategjinë e quajtur “drumbeat messaging”, që konsiston në përsëritjen e vazhdueshme të të njëjtit mesazh për të rritur ndërgjegjësimin. Mosseri e mbrojti këtë praktikë, duke argumentuar se mjetet e sigurisë duhet t’u komunikohen vazhdimisht prindërve në mënyrë që ata të njihen me to.
Padia përfshin edhe akuza se Meta ka mbledhur të dhëna nga fëmijë nën moshën 13 vjeç pa pëlqimin e prindërve, në kundërshtim me ligjet federale dhe shtetërore. Nëse shpallet përgjegjëse, kompania mund të përballet jo vetëm me një dëmshpërblim që mund të arrijë deri në 200 miliardë dollarë, por edhe me detyrimin për të ndryshuar produktet e saj dhe për të forcuar masat e mbrojtjes së fëmijëve. Meta i ka mohuar akuzat dhe e ka cilësuar shumën e pretenduar të dëmeve si të pajustifikueshme.
Gjatë procesit ka dëshmuar edhe ish-inxhinieri i sigurisë në Meta dhe sinjalizuesi Arturo Bejar, i cili e akuzoi kompaninë se kishte ndjekur një qasje të tipit “mos pyet, mos trego” ndaj problemeve të sigurisë së fëmijëve. Juria ka dëgjuar gjithashtu psikologë dhe ish-punonjës të tjerë të kompanisë.
Procesi pritet të vazhdojë gjatë muajit shtator dhe ndër personat që pritet të dëshmojnë është edhe drejtori ekzekutiv i Meta-s, Mark Zuckerberg.
