Zhvillohet një përplasje e re juridike mes UEFA-s dhe drejtuesit të FIFA-s, lidhur me një projekt të dështuar për komercializimin e të drejtave të Kupës së Botës
UEFA ka ndërmarrë një tjetër hap të rëndësishëm kundër presidentit të FIFA-s, Gianni Infantino, duke bërë të ditur se po shqyrton paraqitjen e një kallëzimi penal në Zvicër ndaj tij dhe, potencialisht, ndaj zyrtarëve të tjerë të FIFA-s.
Nisma lidhet me projektin e dështuar FIFA Forward Enterprise (FFE), të ideuar për të shitur një pjesë të të drejtave tregtare të FIFA-s që lidhen me Kupën e Botës për meshkuj dhe femra, si edhe me Kupën e Botës për Klube. Sipas dokumenteve të paraqitura nga avokatët e UEFA-s në një gjykatë federale amerikane, organizata evropiane pretendon se projekti është zhvilluar në mënyrë jo transparente dhe jashtë procedurave normale të qeverisjes së FIFA-s.
Në një dokument prej 56 faqesh, avokatët e UEFA-s deklarojnë se po shqyrtohet mundësia e një procedimi penal në Zvicër ndaj Infantinos dhe personave të tjerë përgjegjës, për keqadministrim kriminal, në kuptim të nenit 158 të Kodit Penal zviceran.
Sipas pretendimeve të UEFA-s, Infantino dhe një grup i kufizuar këshilltarësh e investitorësh e kanë zhvilluar projektin në mënyrë të fshehtë, duke anashkaluar mekanizmat e zakonshëm të vendimmarrjes së FIFA-s dhe pa konsultimin e duhur me Këshillin e FIFA-s.
Një tjetër pikë e kontestuar lidhet me vlerësimin financiar të të drejtave tregtare. UEFA pretendon se vlera e parashikuar në projekt ishte ndjeshëm më e ulët se vlera reale e të drejtave të FIFA-s dhe se procesi nuk iu nënshtrua një procedure të hapur konkurruese apo një vlerësimi të pavarur.
Për të mbështetur çdo procedim të ardhshëm në Zvicër, UEFA i është drejtuar një gjykate federale amerikane për të marrë dëshmi dhe dokumente lidhur me krijimin, strukturën dhe miratimin e FFE-së. Dokumentet që kërkohen përfshijnë komunikime dhe materiale të brendshme mbi procesin e qeverisjes dhe të miratimit të projektit, përfshirë materialet e paraqitura ose të destinuara për Këshillin, Kongresin, Byronë dhe Bordin Drejtues të FIFA-s.
Sipas dokumenteve të cituara nga mediat ndërkombëtare, UEFA kërkon gjithashtu të dhëna lidhur me një takim të zhvilluar në një hotel në Nju Jork, në prag të finales së fundit të Kupës së Botës, ku disa drejtues të lartë të FIFA-s thuhet se janë informuar për projektin. Dy prej pesë drejtuesve pjesëmarrës raportohet se nuk e kanë mbështetur nismën.
Nëse UEFA arrin të sigurojë dokumentacionin e kërkuar, synimi i saj është që këto materiale t’ia paraqesë autoriteteve zvicerane në kuadër të një procedimi penal të mundshëm.
Kjo përplasje shënon një përshkallëzim të ri të konfliktit institucional ndërmjet UEFA-s dhe drejtimit aktual të FIFA-s. UEFA ka kundërshtuar prej javësh vazhdimin e mandatit të Infantinos dhe tashmë po e zhvendos përballjen nga arena politike dhe sportive edhe drejt mekanizmave gjyqësorë dhe penalë.
Çështja pritet të marrë një dimension të rëndësishëm juridik dhe institucional, pasi përballja prek jo vetëm drejtimin e një prej organizatave sportive më të fuqishme në botë, por edhe mënyrën e administrimit, transparencën dhe kontrollin e të drejtave me vlerë shumë të lartë ekonomike në futbollin ndërkombëtar.
