Mijëra njerëz u mblodhën të hënën në Beograd për t’i dhënë lamtumirën Ratko Mladić, ish-komandantit të ushtrisë serbe të Bosnjës, i dënuar me burgim të përjetshëm për gjenocid, krime lufte dhe krime kundër njerëzimit. Ceremonia po zhvillohet me nderime të plota ushtarake, pavarësisht kritikave të forta të Bashkimit Europian ndaj glorifikimit të tij.
Trupi i Mladić u vendos për homazhe në Kishën Ortodokse të Shën Lukës në Beograd, ndërsa mbi arkivol ishin vendosur kapela dhe shpata e tij ushtarake. Patriarku i Kishës Ortodokse Serbe, Porfirije, do të drejtojë shërbesën mortore.
Mladić vdiq më 27 gusht, në moshën 84-vjeçare, në Hagë, ku po vuante dënimin e përjetshëm. Ai u shpall fajtor në vitin 2017, ndër të tjera, për organizimin e masakrës së më shumë se 8 mijë burrave dhe djemve myslimanë në Srebrenicë në korrik 1995, si dhe për rrethimin shumëvjeçar të Sarajevës dhe krime të tjera gjatë luftës së Bosnjës.
Megjithëse ceremonia është organizuar formalisht nga familja, shteti serb dërgoi një avion për të sjellë trupin e Mladić nga Holanda, ndërsa ushtarët e transportuan arkivolin të mbështjellë me flamurin kombëtar. Të shtunën u zhvillua gjithashtu një ceremoni përkujtimore në një ambient zyrtar të ushtrisë serbe.
Vendimi ka shkaktuar përplasje të fortë me Brukselin. Komisionerja europiane për Zgjerimin, Marta Kos, anuloi një vizitë të planifikuar në Serbi, duke deklaruar se “glorifikimi që ka shoqëruar vdekjen e tij është i papajtueshëm me vlerat mbi të cilat ndërtohet rruga drejt BE-së”.
Presidenti serb Aleksandar Vuçiç, i cili nuk po merr pjesë në funeral, e ka përshkruar reagimin publik si një “shpërthim emocional”, duke mohuar se qeveria është ajo që ka lejuar homazhet. Ai akuzoi gjithashtu Perëndimin se prej dekadash i trajton serbët si fajtorë për çdo zhvillim në rajon.
Që prej vdekjes së Mladić, mbështetësit e tij kanë organizuar homazhe, kanë pikturuar murale me portretin e tij në Beograd dhe kanë ndezur fishekzjarre në nder të tij. Të dielën, tifozët në një ndeshje futbolli në kryeqytetin serb shpalosën një portret gjigant të Mladić dhe brohoritën emrin e tij.
Funerali vjen në një moment delikat për Serbinë, vend kandidat për anëtarësim në BE, ndërsa procesi i integrimit është ngadalësuar mes kritikave për gjendjen e demokracisë dhe refuzimit të Beogradit për t’iu bashkuar sanksioneve ndërkombëtare ndaj Rusisë.
Burimi: Associated Press/CNN
