Presidenti turk Recep Tayyip Erdogan ka lëshuar një paralajmërim të fortë ndaj atyre që, sipas tij, ndërmarrin hapa armiqësorë për të rrethuar Turqinë, duke deklaruar se Ankaraja nuk do të qëndrojë si spektatore përballë zhvillimeve që cenojnë interesat e saj.
“Askush të mos krijojë iluzione nga qëndrimi ynë dinjitoz dhe i qetë. Në këto toka që i kemi bërë atdhe duke dhënë dhe marrë jetë, nuk do të lejojmë askënd të kryejë operacione kundër nesh”, deklaroi Erdogan pas mbledhjes së kabinetit në Ankara.
Presidenti turk theksoi se vendi i tij “nuk do të shohë nga vendi” hapa armiqësorë që synojnë rrethimin e Turqisë, ndërsa këmbënguli se Ankaraja nuk është kundër asnjë shteti, shoqërie, besimi apo kulture.
“Ne duam të vazhdojmë rrugën tonë si një shtet i pavarur dhe i begatë në këtë gjeografi të vështirë. Nuk do të lejojmë kurrë që kjo rrugë të bllokohet”, tha ai, duke shtuar se kundërshtimi i atyre që shqetësohen nga forcimi i Turqisë nuk do ta ndryshojë kursin e vendit.
Duke folur për konfliktet në Lindjen e Mesme, Erdogan drejtoi akuza të forta ndaj Izraelit, të cilin e bëri përgjegjës për përshkallëzimin e luftës dhe pasojat e saj në të gjithë rajonin. Sipas tij, koston e konfliktit po e paguajnë jo vetëm populli iranian dhe vendet e Gjirit, por edhe shtete e shoqëri që nuk janë të përfshira drejtpërdrejt.
Ai akuzoi gjithashtu Izraelin se, përmes “gënjeshtrave dhe sabotimit”, ka bërë të paefektshme marrëveshjen e Islamabadit, e cila synonte t’i hapte rrugë përfundimit të luftës.
Erdogan deklaroi ndërkohë se Turqia do të vazhdojë përpjekjet për paqe, stabilitet dhe bashkëpunim rajonal, si dhe do të thellojë marrëdhëniet me Organizatën e Bashkëpunimit të Shangait, të cilën Ankaraja e konsideron plotësuese të Kombeve të Bashkuara.
Pavarësisht tensioneve gjeopolitike, presidenti turk tha se qeveria do të vazhdojë edhe kursin ekonomik, me synimin për ta bërë ekonominë e Turqisë “më të fortë, më konkurruese dhe më rezistente”.
Burimi: AA
