Kompania gjermane Isar Aerospace ka realizuar me sukses lëshimin e raketës “Spectrum” në orbitë, duke shënuar një moment historik për industrinë hapësinore europiane. Sipas kompanisë, kjo është hera e parë që një raketë e zhvilluar privatisht arrin orbitën duke u nisur nga Europa kontinentale.
Raketa u lëshua nga qendra hapësinore Andøya në Norvegji, rreth 18 muaj pas përpjekjes së parë të kompanisë, e cila kishte përfunduar pa sukses.
“Jemi në orbitë! Dhe sapo bëmë histori europiane”, njoftoi Isar Aerospace, ndërsa Ministria gjermane për Kërkimin, Teknologjinë dhe Hapësirën e cilësoi fluturimin një moment historik që dëshmon aftësitë teknologjike dhe hapësinore të Gjermanisë.
“Spectrum” është projektuar për të transportuar ngarkesa të vogla dhe të mesme në orbitën e ulët të Tokës. Në këtë fluturim ajo mbante pesë satelitë të vegjël dhe një eksperiment teknologjik, duke e bërë misionin jo vetëm një test të raketës, por edhe fluturimin e saj të parë me ngarkesë.
Suksesi konsiderohet një hap i rëndësishëm drejt pavarësisë së Europës në lëshimin e satelitëve nga territori i saj, në një treg ku aktualisht dominon fuqishëm SHBA-ja. Sipas Isar Aerospace, vitin e kaluar nga Shtetet e Bashkuara u lëshuan 198 raketa, ndërsa nga Europa vetëm tetë.
Kompania me bazë në Bavari synon të arrijë një kapacitet prodhimi prej rreth 40 raketash në vit dhe ka marrë tashmë porosi deri në vitin 2028. “Spectrum” është konceptuar për të dërguar në orbitë si satelitë civilë, ashtu edhe ushtarakë, duke e vendosur kompaninë europiane në një treg ku konkurrojnë emra si SpaceX dhe ArianeGroup.
Isar Aerospace mori gjithashtu javën e kaluar 200 milionë euro nga Agjencia Europiane e Hapësirës (ESA) për zhvillimin e raketave të reja dhe zgjerimin e infrastrukturës së testimit dhe lëshimit.
