Një studiues i lartë i Inteligjencës Artificiale, i cili gjatë tre viteve të fundit ka punuar në zhvillimin e modeleve bazë në OpenAI dhe Anthropic, ka dhënë dorëheqjen duke lëshuar një paralajmërim të fortë për drejtimin që po merr gara mes kompanive më të mëdha të AI.
Jacob Coxon, 27 vjeç, njoftoi largimin nga Anthropic të martën, duke deklaruar se as kjo kompani dhe as rivali i saj OpenAI nuk po veprojnë me përgjegjshmëri në përpjekjet për të zhvilluar sisteme gjithnjë e më të avancuara.
“Asnjëra kompani nuk po vepron me përgjegjshmëri. Ato po garojnë drejt superinteligjencës që vetëpërmirësohet dhe po luajnë bixhoz me jetët tona”, shkroi Coxon në platformën X.
Studiuesi ishte i specializuar në fazën e paratrajnimit të modeleve të mëdha gjuhësore, teknologjia që qëndron në themel të produkteve si ChatGPT i OpenAI dhe Claude i Anthropic.
Sipas Coxon, rreziku kryesor është se aftësitë e sistemeve të ardhshme të AI mund të zhvillohen shumë më shpejt nga sa mendohet, duke u dhënë atyre potencialisht mundësinë të depërtojnë në sisteme kompjuterike, të trondisin industri të tëra dhe të sigurojnë në mënyrë autonome burime në botën reale.
“Njerëzit që po ndërtojnë AI besojnë seriozisht se ajo mund të na vrasë të gjithëve deri në fund të dekadës. Kjo nuk është një marifet marketingu”, deklaroi ai, duke pretenduar se drejtues dhe studiues të lartë shprehin privatisht frikë më të madhe sesa tregojnë publikisht.
Coxon u bëri thirrje punonjësve të laboratorëve kryesorë të AI të kërkojnë ndryshimin e kushteve të kësaj gare, duke përmendur si mundësi marrëveshje mes kompanive për ngadalësimin e zhvillimit apo edhe një ndalim të përkohshëm të avancimit të aftësive të sistemeve të AI.
Largimi i tij i shtohet rasteve të studiuesve të fokusuar te siguria që kanë braktisur kompanitë kryesore të Inteligjencës Artificiale duke ngritur shqetësime për ritmin e zhvillimit dhe rreziqet që mund të sjellin sistemet gjithnjë e më të fuqishme.
