Kompania ajrore kombëtare e Luksemburgut, Luxair, do të nisë për herë të parë fluturime të rregullta direkte drejt Tiranës, duke shtuar Shqipërinë në rrjetin e saj të destinacioneve.
Linja e re Luksemburg–Tiranë do të nisë më 29 mars 2027 dhe do të operojë gjatë gjithë vitit, me dy fluturime në javë, çdo të hënë dhe të premte.
Biletat kanë dalë tashmë në shitje, ndërsa çmimi më i ulët i njoftuar është 129 euro vajtje-ardhje, pa bagazh.
Sipas kompanisë, kjo do të jetë lidhja e parë e rregullt ajrore direkte mes Shqipërisë dhe Luksemburgut, në një kohë kur interesi turistik për vendin tonë po rritet me shpejtësi. Në njoftimin e Luxair theksohet gjithashtu se Aeroporti Ndërkombëtar “Nënë Tereza” është aktualisht ndër aeroportet me rritjen më të shpejtë në Europë.
Kompania e prezanton Tiranën jo vetëm si një destinacion më vete, por edhe si një portë hyrëse drejt bregdetit shqiptar, zonave të trashëgimisë së UNESCO-s dhe pjesës tjetër të Ballkanit Jugor.
“Tirana ndërthur një eksperiencë dinamike urbane me akses të lehtë në disa prej zonave më tërheqëse të Shqipërisë”, thuhet në njoftimin e Luxair, ku përmenden Sheshi Skënderbej, Blloku dhe Mali i Dajtit.
Hapja e linjës së re vjen ndërsa Shqipëria po konsolidohet gjithnjë e më shumë si një destinacion turistik europian, duke tërhequr edhe kompani të tjera ajrore drejt tregut shqiptar.
Burimi: Luxembourg Times
