Më shumë se 500 mijë persona kanë nënshkruar një peticion që kërkon mbylljen e televizionit francez CNews, i akuzuar se përhap retorikë kundër emigrantëve dhe nxit urrejtjen racore. Nisma ka marrë mbështetje të madhe pas vrasjes së një burri me ngjyrë pranë Parisit, nga një person që, sipas mediave franceze, ndiqte rregullisht këtë kanal televiziv.
Peticioni, i nisur në qershor, mori një shtysë të fortë pas ngjarjes së 23 tetorit, kur një francez me origjinë kongoleze u vra gjatë një sulmi që autoritetet e kanë cilësuar si të motivuar nga urrejtja racore.
Një 39-vjeçar është akuzuar për vrasje dhe tentativë vrasjeje lidhur me sulmin në zonat Trappes dhe La Verrière, në perëndim të Parisit. Sipas prokurorisë, i dyshuari kishte deklaruar se synonte persona që dukeshin myslimanë, afrikanë ose me origjinë nga Afrika e Veriut.
Mediat franceze raportuan se autori i dyshuar ishte ndjekës i rregullt i CNews, një televizion që shpesh krahasohet me Fox News në Shtetet e Bashkuara për qëndrimet e tij konservatore.
Kritikët pretendojnë se përmbajtja e kanalit, veçanërisht diskutimet për emigracionin dhe kriminalitetin, ka kontribuar në krijimin e një klime armiqësore ndaj pakicave. Megjithatë, nuk është provuar se programet e televizionit kanë shkaktuar drejtpërdrejt sulmin.
Në peticion, CNews, në pronësi të miliarderit francez Vincent Bolloré, cilësohet jo si një televizion informativ, por si një “makineri propagande”. Kritikët e akuzojnë gjithashtu se promovon qëndrime të ngjashme me ato të partisë së ekstremit të djathtë, Tubimi Kombëtar, të Marine Le Pen.
Ngjarja ka shkaktuar protesta në Francë. Gjatë një tubimi në Aubervilliers, pranë Parisit, protestuesit mbanin pankarta me mbishkrimin “CNews vret”. Dy deputetë të Partisë së Gjelbër kanë kërkuar gjithashtu heqjen e akreditimit parlamentar të televizionit, duke argumentuar se duhet mbrojtur demokracia nga urrejtja raciste.
Nga ana tjetër, CNews i ka mohuar më parë akuzat se promovon racizëm apo pikëpamje të ekstremit të djathtë, duke deklaruar se mbron lirinë e shprehjes.
CNews është një nga televizionet informative më të ndjekura në Francë. I lançuar në vitin 2017 me vetëm 1% të tregut, ai u bë vitin e kaluar kanali informativ pa pagesë më i ndjekur në vend.
Kalimi i pragut prej 500 mijë firmash ka edhe rëndësi parlamentare. Sipas rregullave të Asamblesë Kombëtare franceze, një peticion me të paktën kaq nënshkrime mund të bëhet objekt debati publik në parlament. Megjithatë, fillimisht duhet të shqyrtohet nga një komision parlamentar, i cili vendos nëse do të zhvillohet debati.
Peticioni nuk sjell automatikisht mbylljen e televizionit, por ka rihapur në Francë debatin mbi kufirin mes lirisë së shprehjes, përgjegjësisë së mediave dhe nxitjes së urrejtjes.
