Shtetet e Bashkuara dhe Australia kanë pezulluar shërbimet konsullore në Brazil për shkak të shqetësimeve të sigurisë, vetëm dy ditë përpara se brazilianët t’u drejtohen kutive të votimit për zgjedhjet presidenciale.
Departamenti amerikan i Shtetit njoftoi se shërbimet konsullore në ambasadë dhe konsullatat e SHBA-së do të pezulloheshin duke nisur nga e premtja, 2 tetor, por nuk dha hollësi mbi natyrën e kërcënimeve dhe nuk i lidhi ato drejtpërdrejt me zgjedhjet e së dielës. Uashingtoni tha se po bashkëpunon ngushtë me autoritetet braziliane për adresimin e shqetësimeve të sigurisë.
Pas vendimit amerikan, edhe Ambasada e Australisë në Brasilia njoftoi mbylljen e saj, duke iu referuar paralajmërimit të SHBA-së dhe duke u kërkuar qytetarëve australianë të shmangin misionet diplomatike amerikane.
Vendimi vjen në një moment të tensionuar politik dhe diplomatik. Brazili voton këtë të diel në raundin e parë të zgjedhjeve presidenciale, ku përballja kryesore është mes Presidentit Luiz Inácio Lula da Silva, i cili kërkon një mandat të katërt, dhe senatorit të djathtë Flávio Bolsonaro, djalit të ish-presidentit Jair Bolsonaro. Sondazhet e paraqesin garën në barazim statistikor.
Marrëdhëniet mes Uashingtonit dhe Brasilias janë tensionuar muajt e fundit nga tarifat tregtare dhe përplasjet diplomatike. Lula dhe aleatët e tij kanë ngritur shqetësime për ndërhyrje të huaj në procesin zgjedhor, ndërsa ligjvënës demokratë amerikanë i kërkuan në fund të shtatorit Sekretarit të Shtetit Marco Rubio sqarime mbi politikën e administratës Trump ndaj Brazilit.
Presidenti Donald Trump nuk ka mbështetur publikisht asnjë kandidat. I pyetur për zgjedhjet braziliane, ai deklaroi se SHBA po e ndjek procesin “shumë nga afër”. Nëse asnjë kandidat nuk siguron shumicën këtë të diel, zgjedhjet do të shkojnë në balotazh më 25 tetor.
