Autoritetet britanike të sigurisë ushqimore kanë lëshuar një paralajmërim urgjent për konsumatorët, pasi në vezë të importuara nga Ukraina është zbuluar bakteri i salmonelës, i lidhur me të paktën 36 raste infektimi gjatë këtij viti në Mbretërinë e Bashkuar.
Agjencia Britanike e Standardeve Ushqimore (FSA) u ka kërkuar qytetarëve të kontrollojnë vezët që kanë blerë dhe të mos konsumojnë produktet e prekura, ndërsa bizneset janë udhëzuar t’i tërheqin menjëherë nga tregu.
Vezët e identifikuara vijnë nga kompania ukrainase Yasensvit Ltd dhe mbajnë kodin 3UA1012066, të stampuar në lëvozhgë. Sipas autoriteteve, analizat kanë konfirmuar praninë e bakterit Salmonella Enteritidis, me një variant të lidhur drejtpërdrejt me rastet e raportuara të infektimit.
FSA ka paralajmëruar se kushdo që ka blerë vezë me këtë kod nuk duhet t’i konsumojë, por t’i hedhë në mënyrë të sigurt. Produktet janë shpërndarë kryesisht përmes tregtarëve me shumicë dhe furnizuesve të restoranteve e bizneseve të ushqimit, por një pjesë e tyre janë shitur edhe në dyqane të vogla.
Jacquelyn McCormick, drejtuese e menaxhimit të incidenteve në Agjencinë e Standardeve Ushqimore, deklaroi se autoritetet kanë ndërhyrë menjëherë për të mbrojtur shëndetin publik.
“Kemi identifikuar Salmonella Enteritidis në vezë të importuara nga një kompani në Ukrainë dhe kemi marrë masa urgjente për të mbrojtur shëndetin publik”, tha ajo.
McCormick sqaroi se paralajmërimi lidhet vetëm me vezët e një kompanie të caktuar ukrainase, jo me të gjitha produktet e importuara nga Ukraina.
Bizneseve u është kërkuar të ndalojnë shpërndarjen dhe shitjen e vezëve të prekura, ndërsa në rastet kur produktet kanë arritur te konsumatorët, duhet të organizohet tërheqja e tyre.
Salmonela është një bakter që mund të shkaktojë infeksione ushqimore, të shoqëruara zakonisht me diarre, temperaturë, dhimbje barku dhe të vjella. Infeksioni mund të jetë më i rëndë te fëmijët e vegjël, të moshuarit dhe personat me imunitet të dobësuar.
Deri tani, paralajmërimi i autoriteteve britanike lidhet me produktet e identifikuara në tregun e Mbretërisë së Bashkuar. Nuk ka ende të dhëna që këto vezë të jenë shpërndarë edhe në Shqipëri apo në vende të tjera.
