Në mëngjesin e sotëm, kryeministri i Shqipërisë, orën e monologut anti-dorëheqje e zhvendosi nga zyra e tij, në Ministrinë e Brendshme, përballë gjithë hierarkisë së Policisë së Shtetit.
Në krah kishte Ministrin e Brendshëm, Ervin Demo, i cili u trajtua nga Rama si një laps me ngjyra në dekorin e tryezës së tij.
Skënder Hitaj, bashkë me zinxhirin komandues pas tij, shihej qartë që ishin të lodhur dhe demotivuar nga lufta 5-ditore me “ushtrinë” e Protestës.
Edi Rama u shfaq me kostum serioz para tyre për t’u dhënë zemër, por zemërimi i papërmbajtur në gji, e tradhtoi. Ai rrëshqiti në narrativën e përditshme, duke kërkuar armiqtë e jashtëm e të brendshëm, politikë e mediatikë, përballë atyre që pas disa orësh i pret një tjetër ditë rraskapitëse, një tjetër betejë e ashpër, të pasigurt nëse do e përballojnë dot ose jo.
Por Edi Rama, megjithëse një sportist i dikurshëm, që duhet të kuptojë limitet fizike dhe psikologjike të “ushtarëve” të hedhur në fushë betejё, përsëri u foli sikur të ishte dita e parë e saj.
Në fytyrat e policëve dhe oficerëve të lartë nuk dallohej asnjë grimasë që të tregonte entuziazëm për të ardhmen me rroga të larta, Shqipërinë në Evropë, e të tjera premtime që tashmë janë bërë bajate për të gjithë, përfshirë dhe ata vetë.
Humori me iPhone 18 që u përzgjodh nga grabitja e dyqaneve të Vodafone prej Tik-Tokerëve, nuk bëri asnjë polic të qeshte. Përkundrazi, profesor Ervin Demon e vendosi në siklet.
A e ka humbur toruan kryeministri i Shqipërisë?
Ai kërkon dialog por jo me ata që janë pas “gurit”.
Kërkon zgjidhje politike, por jo me ata që qëllojnë me “gurë” qeverisjen e tij.
Godet prokurorët e Tiranës që nuk burgosin pronarët e mediave News24 dhe Syri.net, pa harruar edhe gjyqtarët që nuk i mbajnë në burg protestuesit adoleshentë.
Kërcënon mësuesit, prindërit e nxënësve, armiqtë e sheshit dhe të TV-së. Të gjithë ata që kërkojnë që ai të dorëhiqet.
Dhe ata janë të shumtë, brenda dhe jashtë vendit.
Nëse policët e varfër përpiqet t’i motivojë me 2500 euro, a do mundet ta demotivojë “ushtrinë” e rinisë shqiptare që kërkon rrëzimin e tij?
Orët e kësaj të hëne dhe javës në vazhdim janë vendimtare për “toruan” e kryeministrit, por më shumë për toruan e një shoqërie që po qëndron e heshtur, teksa adoleshentët e saj janë ngritur në revoltë për të mos u kthyer më pas, në 36 vitet kryeministrore të Shqipërisë.
Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
