YouTuberi i kthyer në boksier profesionist, Jake Paul, do të përballet me ish-kampionin e botës në peshat e rënda, Anthony Joshua, në një duel të shumëpritur më 19 dhjetor.
Ndeshja e kategorisë së rëndë, e cila do të zhvillohet me tetë raunde nga tre minuta, pritet të marrë skenën në Kaseya Center në Miami, dhe do të transmetohet drejtpërdrejt në Netflix.
Ky do të jetë testi më i vështirë në karrierën e 28-vjeçarit Paul, i cili mban një rekord prej 12 fitoresh dhe 1 humbje (7 KO). Ai u ngjit për herë të fundit në ring në qershor, kur mposhti me vendim unanim ish-kampionin e botës në peshë të mesme Julio Cesar Chavez Jr.
“Ky nuk është simulim AI. Është Dita e Gjykimit,” tha Paul për Netflix. “Një duel profesionist në peshë të rëndë kundër një kampioni elitar në kulmin e karrierës. Kur të mposht Anthony Joshua, çdo dyshim zhduket dhe askush s’mund të më mohojë shansin për titull bote.”
Në krahun tjetër, Joshua, 36 vjeç, dy herë kampion i unifikuar botëror dhe fitues i medaljes së artë olimpike, nuk ka luftuar që nga humbja ndaj Daniel Dubois në shtator 2024 në duelin për titullin IBF.
“Kam qenë jashtë për pak kohë, dhe tani po kthehem me një spektakël të madh. Jam këtu për të bërë shifra rekord dhe për të thyer çdo statistikë … Do të thyej internetin mbi fytyrën e Jake Paul”, deklaroi Joshua.
Përballja pritet të tërheqë një vëmendje të jashtëzakonshme globale dhe të jetë një nga ngjarjet më të mëdha sportive të fundvitit.
© Ahmed Yosri/Reuters
