Gjykata e Korçës ka vendosur të zbusë masën e sigurisë për Leonidha Guçen dhe Denis Meçen, të akuzuar për vrasjen e Egli Progës më 10 gusht 2024, duke i kaluar nga paraburgimi në “arrest shtëpie”. Praktikisht, të gjithë të dyshuarit që morën pjesë apo asistuan në vrasjen e Eglit, janë të lirë ose në shtëpi, me “lejen” e gjykatës.
Vendimi është marrë pasi afati ligjor i paraburgimit ka përfunduar, ndërsa hetimet për ngjarjen vijojnë ende. Burime pranë gjykatës bëjnë të ditur se çështja ka mbetur pezull për shkak të pritjes së analizës së pamjeve filmike të sekuestruara në lokalin “Stropcka”, ku ndodhi ngjarja. Një pjesë e këtyre pamjeve dyshohet se janë fshirë dhe për këtë arsye pajisja e regjistrimit është dërguar jashtë vendit për rikuperim dhe ekspertim.
Pikërisht kjo vonesë në përfundimin e analizës së provave vizuale është përdorur nga avokatët mbrojtës të të dy të dyshuarve, të cilët kërkuan ndryshimin e masës së sigurisë. Gjykata ka pranuar kërkesën, duke vendosur që Guçe dhe Meçe të presin vijimin e procedurave hetimore në kushtet e arrestit shtëpiak, ndërkohë tre të dyshuarit e tjerë për kryerjen e krimit, janë lënë të lirë prej disa muajsh.
Dy të dyshuarit kryesorë, Denis Meçe dhe Leonidha Guçe, vijojnë të jenë nën akuzë për “vrasje me dashje” të kryer në bashkëpunim, kur njëri prej tyre (Meçe) jo vetëm që e ka pranuar krimin, por ka përfshirë në deklarimet e tij edhe Guçen si bashkëpunëtor.
Ndërsa hetimet për zbardhjen e plotë të ngjarjes mbeten në zhvillim, prokuroret e çështjes ende pas 15 muajsh nuk kanë siguruar provat e nevojshme për t`i nxjerrë para bankës së të akuzuarve autorët.
