Një dokument i klasifikuar i hartuar nga Gjermania për një konflikt të mundshëm ushtarak me Rusinë është rikthyer në qendër të vëmendjes, pasi media ndërkombëtare – përfshirë Wall Street Journal – raportuan ekzistencën e një “plani sekret” që parashikon mobilizimin e trupave të NATO-s në territorin gjerman. Plani, i hartuar në vitin 2022, paraqet skenarë logjistikë mbi mënyrën se si NATO – dhe jo vetëm Bundeswehr-i – do të vendoste deri në 800.000 trupa dhe rreth 200.000 mjete ushtarake në Gjermani nëse Moska do të niste një sulm ndaj territorit evropian. Dokumenti përfshin mbi 1.200 faqe dhe synon të tregojë gatishmërinë e aleancës së udhëhequr nga SHBA për të reaguar në kohë reale ndaj çdo agresioni rus. Edhe pse është cilësuar si “sekret”, ai duket se ka qenë i njohur pёr publikun prej të paktën tre vitesh.
Një zëdhënës i Komandës së Lartë Gjermane konfirmoi ekzistencën e planit, por refuzoi të komentojë detaje për arsye sigurie, duke theksuar se dokumenti përcakton detyrimet e forcave gjermane dhe institucioneve civile në rast konflikti: “Për arsye të sigurisë ushtarake, nuk mund të hyjmë në detaje dhe nuk mund të konfirmojmë informacionet e raportuara”. I njohur si “Oplan Deu” (Operation Plan Germany), dokumenti konsiderohet analitik dhe jo detyrues, dhe synon të sinjalizojë Kremlinin se Evropa dhe SHBA-të janë të përgatitura për konfrontim, nëse ai bëhet i pashmangshëm. Ai identifikon portet dhe rrjetin hekurudhor strategjik, autostradat kryesore dhe rrugët që NATO do të përdorte për të zhvendosur forcat drejt kufirit lindor.
Rikthimi i planit në diskutim vjen në një moment kur SHBA-të, të lodhura nga angazhimi i gjerë global, po kërkojnë një ngrirje të konfliktit në Ukrainë përmes negociatave me Rusinë, ndërsa Evropa nxitet të marrë më shumë përgjegjësi në mbrojtjen e kontinentit. Përveç rritjes së buxheteve të mbrojtjes, objektivi është krijimi i një efekti parandalues përmes presionit politik dhe retorikës së ashpër. Zyrtarë të NATO-s dhe qeverisë gjermane kanë paralajmëruar se Rusia mund të jetë në gjendje të godasë Evropën brenda dy deri në pesë viteve të ardhshme – një skenar teknikisht i vështirë, por i rëndësishëm për të siguruar mbështetje publike dhe unitet politik.
“Shikoni hartën”, thotë Tim Stuchtey, drejtor i Institutit të Brandenburgut për Shoqëri dhe Siguri, duke argumentuar se pozita gjeografike e Gjermanisë e bën atë rrugë të detyrueshme tranziti për forcat e NATO-s, me Alpet që bllokojnë krahun jugor të kontinentit. Ndjenja gjermane e ekspozimit, e njohur si mittellage, lidhet me frikën tradicionale se vendi është i rrethuar dhe i pambrojtur në qendër të Evropës. Por dekada investimesh të pamjaftueshme në infrastrukturë kanë lënë ura, hekurudha, porte dhe autostrada në gjendje të dobët – një pikë e brishtë që Rusia mund ta shfrytëojë përmes sabotimit, sulmeve kibernetike dhe bllokimit të sinjaleve GPS.
(Pёrshtatur nga Wall Street Journal)
