Një thirrje pro-Palestinë i kushtoi vendin e punës një punonjëseje sezonale të teatrit “La Scala”, por Gjykata e Punës në Milano vendosi se shkarkimi i saj ishte i paligjshëm. Ngjarja ndodhi më 4 maj, pak para fillimit të një koncerti ku ishte e pranishme edhe kryeministrja Giorgia Meloni, kur punonjësja – studente universitare – thirri “Liri për Palestinën”. Teatri tani duhet ta dëmshpërblejë për pagën deri më 30 shtator kur duhet t`i pёrfundonte rregullisht kontrata dhe shpenzimet ligjore.
Sipas vendimit gjyqësor, masa e shkarkimit nuk ka qёnё e mbështetur ligjërisht. Avokati i saj, Alessandro Villari, e përshkroi vendimin si “një çështje parimore”, duke thënë se një punonjës nuk mund të humbasë vendin e punës vetëm sepse ka shprehur mendimin e tij, edhe kur kjo ndodh publikisht. Ai shtoi se është interesant fakti që artistë të njohur si Roberto Bolle kanë bërë deklarata publike nga skena dhe janë vlerësuar, ndërsa në këtë rast dikё e pushuan direkt nga puna.
Incidenti shkaktoi tensione të menjëhershme në sallë dhe çoi drejtuesit e teatrit të hapnin procedim disiplinor, pёr shkak se sjellja e vajzёs u vlerёsua si e papërshtatshme në një kontekst institucional. Çështja ndezi debat të gjerë publik për muaj të tërë, veçanërisht për shkak të pranisë së Kryeministres në ngjarje.
Vendimi gjyqësor ka shkaktuar reagime të shumta nga sindikatat, shoqatat dhe politika. Disa e kanë cilësuar që në fillim shkarkimin si një veprim politik dhe kanë organizuar protesta, greva dhe peticione në mbështetje të punonjëses. Këshilltari i Partisë së Gjelbër, Carlo Monguzzi, madje propozoi kandidimin e saj për çmimin qytetar “Ambrogino d’Oro”, ndërsa deputeti i Aleancës së Majtë të Gjelbër, Nicola Fratoianni, i është drejtuar me interpelancë Ministrit të Kulturës, Alessandro Giuli.
Sipas sindikatës CUB Scala, vendimi i gjykatës “konfirmon se bëhej fjalë për një shkarkim politik”, duke nënvizuar se shprehja e një opinioni nuk mund të trajtohet si krim. Sindikata u ka bërë thirrje punonjësve të hyjnë në grevë më 28 nëntor dhe të marrin pjesë në demonstratën kombëtare pro-Palestinë në Milano të nesërmen. Për më tepër, CUB i ka kërkuar teatrit të rinovojë kontratën e punonjëses “për të shmangur padi të tjera”.
Teatri “La Scala” nuk ka dalё ende me një qëndrim zyrtar pas vendimit.
(Burimi: TGCOM)
