Kim Kardashian është përballur me një valë kritikash në rrjetet sociale dhe nga organizata për mbrojtjen e kafshëve PETA, pasi u shfaq në Aspen e veshur nga koka te këmbët me peliҫe, ndërkohë që i kishte surprizuar katër fëmijët e saj me nga një qenush për Krishtlindje.
Ajo u fotografua teksa vizitonte një dyqan Prada në Aspen, duke veshur një peliҫe të gjatë ngjyrë kafe, të kombinuar me një shall masiv nga një material i ngjashëm. Pallton e mbajti të hapur për të nxjerrë në pah një korse bezhë dhe pantallona lëkure, ndërsa pamja e saj glam nuk kaloi pa polemika.
Shumë ndjekës reaguan në rrjetet sociale, duke kujtuar se Kardashian kishte deklaruar në vitin 2018 se kishte hequr dorë nga veshja e peliҫes së vërtetë, pas një apeli publik nga aktorja Pamela Anderson. “A nuk kishte thënë se nuk do të vishte më kurrë peliҫe?”, shkroi një komentues, ndërsa të tjerë e akuzuan se promovon shfrytëzimin e kafshëve për modë.
Reagimet u shtuan edhe më shumë pasi u bë e ditur se Kim kishte blerë nga një qenush tё racës Pomeranian për secilin nga katër fëmijët e saj: North (12), Saint (10), Chicago (7) dhe Psalm (6). Kritikat nuk erdhën vetëm nga fansat, por edhe nga PETA. Themeluesja e organizatës, Ingrid Newkirk, deklaroi se “qenushët nuk janë lodra” dhe se Kim kishte humbur një mundësi për të promovuar adoptimin e kafshëve nga strehëzat.
“Kriza e kafshëve të pastreha po injorohet në mënyrë të pafalshme,” tha Newkirk, duke i bërë thirrje Kardashian dhe motrës së saj Khloé që herën tjetër të bashkëpunojnë me strehëza lokale dhe të ndihmojnë në nisma për sterilizimin dhe adoptimin e kafshëve.
Edhe fansat shprehën shqetësim për dhurimin e kafshëve shtëpiake si dhurata për fëmijë. “Qentë nuk janë aksesorë apo lodra për Krishtlindje,” shkroi një përdorues, ndërsa një tjetër shtoi se “çdo fëmijë mori një qenush sikur të ishte një lodër prej pellushi”.
Kjo nuk është hera e parë që Kim Kardashian përballet me kritika për zgjedhjet e saj të modës dhe luksit. Vetëm vitin e kaluar ajo u vu në shënjestër pasi shfaqi disa çanta të rralla Hermès prej lëkure krokodili, me një vlerë të përllogaritur mbi 1 milion dollarë.
Pavarësisht polemikave, Kardashian nuk ka reaguar ende publikisht ndaj kritikave të fundit, ndërsa pamjet e saj nga Aspen vazhdojnë të qarkullojnë gjerësisht në rrjetet sociale.
(Burimi: The Sun / Daily Mail / PETA)
