Një praktikë mjekësore e përdorur prej dekadash për të mbrojtur foshnjat nga hemorragjitë po përballet me një rritje shqetësuese të refuzimeve nga prindërit. Bëhet fjalë për injeksionin e vitaminës K, i cili zakonisht jepet menjëherë pas lindjes për të parandaluar gjakderdhjet potencialisht fatale.
Neonatologët raportojnë se nё SHBA rastet e refuzimit janë shtuar ndjeshëm. Nëse më parë shihnin një ose dy prindër në javë që nuk e pranonin injeksionin, tani disa mjekë thonë se përballen me disa raste çdo ditë. Madje, një foshnjë pësoi hemorragji në tru – një komplikacion që mund të ishte parandaluar me këtë vitaminë.
Vitamina K është thelbësore për mpiksjen e gjakut, por ajo nuk kalon mjaftueshëm nga placenta tek foshnja dhe gjendet në sasi të vogla në qumështin e gjirit. Për këtë arsye, të porsalindurit janë në mungesë të saj derisa fillojnë ushqimin e ngurtë. Pa këtë mbrojtje, ata mund të përballen me hemorragji që varion nga probleme të lehta deri në hemorragji në tru ose në traktin gastrointestinal.
Një dozë e vetme pas lindjes e eliminon pothuajse plotësisht këtë rrezik dhe rekomandohet për të gjithë të porsalindurit nga Akademia Amerikane e Pediatrisë që prej viteve ’60. Megjithatë, një studim i fundit tregon se përqindja e foshnjave në SHBA që nuk e marrin injeksionin është rritur në mbi 5% në vitin 2024, nga më pak se 3% në vitin 2017.
Mjekët besojnë se ky fenomen lidhet pjesërisht me rritjen e skepticizmit ndaj ndërhyrjeve mjekësore, edhe pse vitamina K nuk është vaksinë. Disa prindër e konsiderojnë injeksionin “jo natyral” ose të panevojshëm, ndërsa të tjerë kërkojnë alternativa orale – të cilat nuk janë të miratuara për foshnjat dhe kërkojnë administrim të përsëritur për javë të tëra.
Shqetësime janë ngritur edhe për një konservues të përdorur në injeksion, por ekspertët theksojnë se nuk ka prova që sasia e vogël e tij shkakton dëm. Gjithashtu, studime më të mëdha kanë hedhur poshtë një pretendim të vjetër që e lidhte vitaminën K me leukeminë.
Edhe pse mungesa e vitaminës K është relativisht e rrallë, pasojat mund të jenë dramatike. Disa studime sugjerojnë se rreth 20% e rasteve të rënda mund të jenë fatale, ndërsa shumë foshnja që mbijetojnë përballen me dëmtime të përhershme të trurit ose aftësi të kufizuara.
Ky realitet lidhet edhe me praktikën në Shqipëri, ku injeksioni i vitaminës K u jepet të porsalindurve në maternitet si pjesë e kujdesit standard, pa pyetur madje fare prindërit. Duke parë rreziqet serioze që parandalon kjo procedurë, ekspertët e shëndetit sugjerojnë se një praktikë e tillë nuk duhet të ndryshojë, por përkundrazi të vazhdojë si një masë thelbësore për mbrojtjen e jetës së foshnjave.
Mjekët theksojnë se problemi kryesor është se nuk mund të parashikohet se cila foshnjë do të preket. Për këtë arsye, ata vijojnë të këmbëngulin se injeksioni mbetet një nga mënyrat më të sigurta dhe efektive për të mbrojtur jetën dhe shëndetin e të porsalindurve.
(Burimi: The New York Times)
