Të ushqyerit në mënyrë të pavarur dhe zhvillimi i gjuhës, edhe pse duken procese të ndryshme, janë të lidhura ngushtë. Një studim ndërkombëtar i udhëhequr nga Universitetet Tor Vergata dhe Sapienza në Romë ka zbuluar se fëmijët që hanë vetë kanë tendencë të zhvillojnë më herët aftësitë e komunikimit, duke shfaqur më shumë vokalizime dhe gjeste që në moshën njëvjeçare.
Hulumtimi, i publikuar në revistën shkencore Child Development, përfshiu rreth 200 fëmijë dhe u realizua në bashkëpunim me Universitetin Niccolò Cusano, Institutin e Lartë të Shëndetësisë në Itali dhe Institutin e Shkencave dhe Teknologjive Njohëse të Këshillit Kombëtar të Kërkimit.
Ekspertët theksojnë se të ngrënit në mënyrë të pavarur është një nga fazat më të rëndësishme të rritjes dhe zakonisht fitohet brenda dy viteve e gjysmë të para të jetës. Sipas studiueses Giulia Pecora nga Universiteti Tor Vergata, koha e vakteve nuk shërben vetëm për të plotësuar nevojat ushqimore, por është edhe një moment ku aktivizohen procese të shumta zhvillimore, duke përfshirë aftësitë motorike, njohëse dhe socio-emocionale.
Rezultatet tregojnë se inkurajimi i fëmijëve për të ngrënë vetë ndikon pozitivisht edhe në tё folur. Studiuesja Francesca Bellagamba shpjegon se fëmijët që fitojnë herët këtë pavarësi kanë më shumë mundësi të lёvizin ushqimin dhe të përmirësojnë koordinimin e duarve. Kjo, nga ana tjetër, ndihmon në komunikimin përmes gjesteve – një element thelbësor në fazat e para të zhvillimit.
Studimi sugjeron se nxitja e autonomisë gjatë vakteve mund të jetë një hap i rëndësishëm jo vetëm për pavarësinë e fëmijës, por edhe për zhvillimin e aftësive të tij gjuhësore.
(Burimi: ANSA)
