Jeffrey Epstein kishte një mesazh që donte t’ia përcillte presidentit rus Vladimir Putin.
Ishte qershor 2018 – rreth një vit pasi ambasadori rus në Kombet e Bashkuara, Vitaly Churkin, kishte vdekur papritur. Sipas dokumenteve të reja të publikuara nga Departamenti amerikan i Drejtësisë, Churkin ishte një nga zyrtarët me të cilët Epstein takohej rregullisht në Nju Jork, madje kishte ofruar ta ndihmonte djalin e tij, Maxim, të gjente një punë në një kompani menaxhimi pasurie në qytet.
Tani Epstein kërkonte të fliste me një tjetër zyrtar rus: ministrin e Jashtëm Sergey Lavrov. Më 24 qershor 2018, ai i dërgoi një email politikanit norvegjez Thorbjørn Jagland, në atë kohë sekretar i përgjithshëm i Këshillit të Europës: “Mendoj se mund t’i sugjerosh Putinit që Lavrov të mund të marrë një ide duke folur me mua. Vitaly Churkin e bënte këtë, por ai vdiq?!”
Jagland u përgjigj se do të takohej me ndihmësin e Lavrovit të hënën pasuese dhe do t’ia sugjeronte. Epstein iu përgjigj: “Churkin ishte i shkëlqyer. Ai e kuptoi Trumpin pas bisedave tona. Nuk është komplekse. Ai duhet ta shohё sikur po merr diçka – kaq e thjeshtë.”
Ndërsa interesi i Epstein për të rekrutuar modele nga Rusia dhe Europa Lindore ishte bërë i ditur më parë, publikimi i fundit i dokumenteve ofron një pasqyrë të re mbi përpjekjet e tij për t’u afruar me figura me ndikim në Rusi, përfshirë Putinin, me të cilin u përpoq të takohej ose të fliste disa herë.
Publikimi i komunikimeve me politikanë ndërkombëtarë ka shtuar spekulimet mbi motivet e miliarderit. Kryeministri polak Donald Tusk deklaroi në një mbledhje të kabinetit se vendi i tij do të nisë një hetim për lidhjet e mundshme të Epstein me inteligjencën ruse. “Gjithnjë e më shumë pista, gjithnjë e më shumë informacione dhe komente në shtypin global lidhen me dyshimin se ky skandal i paprecedentë pedofilie u bashkëorganizua nga shërbimet ruse të inteligjencës,” tha ai. “Nuk kam nevojë t’ju them sa serioze është për sigurinë e shtetit polak mundësia gjithnjë e më e besueshme që shërbimet ruse të kenë bashkëorganizuar këtë operacion. Kjo mund të nënkuptojë se ata posedojnë edhe materiale komprometuese ndaj shumë liderëve ende aktivë sot.”
Kremlini i hodhi poshtë sugjerimet se Epstein ishte spiun rus. “Teoria se Epstein kontrollohej nga shërbimet ruse të inteligjencës mund të interpretohet në çdo mënyrë, por jo seriozisht,” tha zëdhënësi Dmitry Peskov, duke shtuar se gazetarët nuk duhet “të humbasin kohë” me këto akuza.
Analistët i thanë CNN se dokumentet tregojnë pak më shumë sesa përpjekjet e Epstein për t’u afruar me figura me ndikim dhe për t’u pozicionuar si një lojtar gjeopolitik. Dokumentet nuk tregojnë nëse ai arriti ndonjëherë të lidhej me presidentin rus.
Më 9 maj 2013, Epstein i shkroi ish-kryeministrit izraelit Ehud Barak se Jagland “do të takojë Putinin në Soçi” më 20 maj dhe se Jagland kishte pyetur nëse Epstein do të ishte i disponueshëm të takohej me presidentin rus “për të shpjeguar se si Rusia mund të strukturojë marrëveshje për të nxitur investimet perëndimore.” Epstein shtoi: “Nuk e kam takuar kurrë, doja qё ta dije.”
Pak ditë më vonë, më 14 maj 2013, Jagland i tha se planifikonte t’i përcillte Putinit një mesazh në emër të Epstein se ai mund të ishte i dobishëm. “Kam një mik që mund t’ju ndihmojë të merrni masat e nevojshme (dhe më pas t’ju prezantojë) dhe të pyesë nëse do të ishte interesante për të t’ju takonte,” shkroi ai.
Epstein u përgjigj: “Ai është në një pozicion unik për të bërë diçka madhështore, siç bëri Sputnik për garën hapësinore. Mund t’i thuash se ti dhe unë jemi të afërt dhe se unë këshilloj Gates. Kjo është konfidenciale. Do të isha i lumtur ta takoja, por për minimumi dy deri në tre orë, jo më pak.”
Përmes një zëdhënësi, Bill Gates e ka përshkruar publikisht shoqёrimin me Epstein si një “gabim serioz në gjykim”, por ka mohuar çdo sjellje të papërshtatshme.
Në një tjetër email drejtuar Barak më 21 maj 2013, Epstein pretendonte pa dhënë prova se kishte refuzuar një kërkesë nga Putin për një takim gjatë një konference ekonomike ruse në Shën Petersburg. Ai shkroi se nëse Putin donte ta takonte, do t’i duhej “të jepte kohё dhe privatësi.” Nuk është e qartë nëse një kërkesë e tillë ka ekzistuar.
Më shumë se një vit më vonë, në korrik 2014, një email sugjeron se Epstein kishte një takim të planifikuar me Putinin dhe kishte ftuar themeluesin e LinkedIn t’i bashkohej. Joi Ito, atëherë drejtor i MIT Media Lab, i shkroi: “Nuk arrita ta bind Reid-in të ndryshonte programin për të shkuar të takonte Putinin me ty. 😉” Ito më vonë kërkoi falje për lidhjen me Epstein dhe për pranimin e fondeve për laboratorin.
Disa nga komunikimet e Epstein me figura ruse ndodhën në një moment të ndjeshëm për marrëdhëniet SHBA-Rusi, pas akuzave të inteligjencës amerikane për ndërhyrjen ruse në zgjedhjet presidenciale të vitit 2016.
Në qershor 2018, Jagland i shkroi Epstein se shpresonte të qëndronte në rezidencën e tij në Paris dhe se do të vinte nga Moska, ku planifikonte të takohej me Putinin, Lavrovin dhe Dmitry Medvedev, atëherë kryeministër. Epstein iu përgjigj: “Thjesht më vjen keq që nuk jam me ty për të takuar rusët.”
Të enjten, njësia hetimore norvegjeze Økokrim njoftoi se kishte hapur një hetim ndaj Jagland bazuar në informacionet e dokumenteve. Avokati i tij tha se klienti do të bashkëpunojë dhe do të paraqesë “gjetjet kryesore dhe dokumentacionin përkatës”, duke shtuar se mbeten të sigurt për rezultatin. Jagland ka mohuar çdo shkelje.
Dokumentet sugjerojnë se Epstein kishte një marrëdhënie të afërt me të paktën një rus që kishte lidhje me FSB-në, shërbimin kryesor të sigurisë në Rusi dhe pasardhësin e KGB-së. Në një email të vitit 2015 drejtuar investitorit Peter Thiel, Epstein e quajti Sergey Belyakov “miku im shumë i mirë”. Ai ofroi ta prezantonte me Belyakovin, i cili drejtonte Fondacionin e Forumit Ekonomik të Shën Petersburgut, përgjegjës për organizimin e konferencës më të madhe ekonomike në Rusi.
Pasi mori pjesë në forum në vitin 2015, Barak i raportoi Epstein se kishte takuar disa zyrtarë rusë, përfshirë Lavrovin dhe guvernatoren e bankës qendrore Elvira Nabiullina. “Faleminderit që organizove gjithë këtë,” shkroi ai.
Zyra e Barak deklaroi se vizitat e tij ishin gjithmonë me ftesë të zyrës së Putinit dhe se ai “kurrë nuk e ngriti” emrin e Epstein në Kremlin, megjithëse herë pas here diskutonin çështje botërore dhe njerëzit që kishin takuar.
Në një shkëmbim të vitit 2016, Belyakov i tha Epstein se kishte nisur një detyrë të re në Fondin Rus të Investimeve Direkte dhe kërkonte investime për projekte ruse. Epstein iu përgjigj: “Do të bëj gjithçka që është e dobishme për ty.”
Epstein iu drejtua gjithashtu Belyakovit për ndihmë. Në një korrespondencë të vitit 2015, ai shkroi se një “vajzë” ruse nga Moska po përpiqej të shantazhonte një “grup biznesmenësh të fuqishëm” në Nju Jork dhe se “është keq për biznesin dhe për të gjithë të përfshirët.” Ai i tregoi kur do të mbërrinte ajo dhe hotelin ku po qëndronte, duke shkruar nё fund: “Sugjerime?”
Epstein pretendoi gjithashtu se kishte dhënë këshilla për oligarkun rus Oleg Deripaska. Në një email të vitit 2018 me investitorin Jide Zeitlin, ky i fundit e falënderon për “mendimet rreth Deripaskës”, i cili ishte sanksionuar nga SHBA një muaj më parë. Epstein ia përcolli korrespondencën Steve Bannonit duke shkruar: “Thjesht po të mbaj në dijeni.”
Një email i vitit 2010 përmend një përpjekje për të organizuar një takim mes Epstein dhe dikujt të quajtur “Oleg”: “Po ju shkruaj për të parë cilat janë mundësitë që Jeffrey dhe Oleg të takohen në Moskë javën tjetër të martën ose të mërkurën? Ose ndoshta Oleg ka plane të jetë në Paris javën tjetër?” Nuk dihet nëse u takuan ndonjëherë.
Një tjetër ruse në rrethin e Epstein ishte sipërmarrësja Masha Drokova Bucher, dikur pjesë e një grupi rinor pro-Putin. Ajo e ndihmoi me marrëdhëniet publike në vitin 2017 dhe më pas i dërgoi video ku këndonte, duke i thënë se ishte “rifreskuar” pasi nuk kishte përdorur “asnjë substancë për njëfarё kohe.” Ajo i atribuoi Epsteinit meritën për krijimin e fondit të saj të investimeve në 2018 dhe i shkroi në 2019: “Kam menduar për të gjitha gjërat e mira që më mësove. Nuk do ta krijoja kurrë fondin tim pa idetë dhe njohuritë që ndave me mua dhe e dua shumë punën time. Faleminderit që je një mik kaq i mirë, Jeffrey!”
Regjistrat e fluturimeve tregojnë se Epstein vizitoi Rusinë. Ai dhe Ghislaine Maxwell udhëtuan atje në nëntor 2002 me avionin e tij privat, duke fluturuar nga Kopenhageni në aeroportin Vnukovo të Moskës, më pas në Shën Petersburg dhe dy ditë më vonë drejt Irlandës.
Një foto e publikuar në Flickr nga Esther Dyson e tregon Epstein në Sarov, një qytet rus me një qendër të mbyllur kërkimore bërthamore. Dyson konfirmoi autenticitetin e fotos. Epstein njihej për interesin e tij në shkencë dhe teknologji.
Ai aplikoi përsëri për një vizë ruse në vitin 2018 dhe një email tjetër tregon se ekipi i tij pyeti për transferimin e saj në një pasaportë të re në mars 2019, vetëm disa muaj para arrestimit për akuza federale që lidhen me trafikimin seksual të të miturve.
Megjithatë, pavarësisht korrespondencës së gjerë dhe përpjekjeve të dukshme për të hyrë në rrethet më të larta të pushtetit rus, mbetet e paqartë nëse Jeffrey Epstein arriti ndonjëherë të siguronte takimin që kërkonte me Vladimir Putinin.
(Burimi: CNN)
