Është bërë publik traileri zyrtar i filmit biografik “Michael”, një projekt kinematografik që rikthen në fokus jetën dhe rrugëtimin artistik të Michael Jackson, një prej figurave më emblematike të muzikës botërore. Në rolin kryesor shfaqet Jaafar Jackson, nipi i artistit, i cili sjell në ekran portretizimin e xhaxhait të tij në këtë produksion ambicioz.
Filmi synon të shkojë përtej imazhit të yllit global, duke ndjekur transformimin e Michael Jackson nga një fëmijë me talent të jashtëzakonshëm, i njohur fillimisht si vokalisti kryesor i Jackson Five, deri në shndërrimin në një artist vizionar, ambicia dhe këmbëngulja e të cilit e formësuan si një nga figurat më me ndikim në historinë e muzikës. Rrëfimi ndërthur jetën personale të Jackson me momente kyçe të karrierës së tij solo, përfshirë performanca që kanë lënë gjurmë të pashlyeshme në kulturën pop.
Nga materialet promovuese të publikuara deri më tani, mbetet e paqartë nëse filmi do të ndalet edhe te polemikat dhe debatet që shoqëruan vitet e fundit të jetës së artistit çështje që vazhdojnë të ndajnë publikun dhe kritikën.
Regjia e filmit mban firmën e Antoine Fuqua, ndërsa kasti përfshin një sërë emrash të njohur të kinemasë. Miles Teller interpreton avokatin dhe bashkëpunëtorin e ngushtë të Jackson, John Branca; Colman Domingo shfaqet në rolin e babait të tij, Joe Jackson; Nia Long interpreton nënën Katherine Jackson; ndërsa Jessica Sula sjell në ekran motrën LaToya Jackson.
Në film marrin pjesë gjithashtu Larenz Tate si themeluesi i Motown Records, Berry Gordy; Laura Harrier në rolin e producentes muzikore pioniere Suzanne de Passe; Kat Grahamsi Diana Ross; si edhe Giuliano Valdi, i cili portretizon Michael Jackson gjatë periudhës së Jackson 5.
Filmi biografik “Michael” pritet të shfaqet në kinematë botërore më 24 prill 2026. Publikimi i trailerit ka rritur ndjeshëm interesin dhe debatet rreth mënyrës se si do të ndërtohet në ekran portreti i një figure sa komplekse, aq edhe të adhuruar të muzikës moderne.
