Një model i ri i inteligjencës artificiale i zhvilluar nga kompania kineze ByteDance, pronare e TikTok, ka futur në alarm industrinë e filmit në SHBA. Mjeti i quajtur Seedance 2.0 është në gjendje të krijojë video me cilësi kinematografike – me dialog, efekte zanore dhe skena aksioni – vetëm nga disa udhëzime të shkruara.
Versioni i parë i Seedance u lançua në qershor 2025 pa shumë zhurmë, por përditësimi i dytë, i publikuar tetë muaj më vonë, ka shkaktuar reagime të forta. Video të krijuara me këtë model, që përfshijnë personazhe si Spider-Man dhe Deadpool, u bënë virale në rrjet, duke nxitur reagimin e menjëhershëm të studiove të mëdha si Disney dhe Paramount, të cilat akuzuan ByteDance për shkelje të të drejtave të autorit.
Megjithatë, shqetësimi nuk kufizohet vetëm te çështjet ligjore. Ekspertë të industrisë thonë se cilësia e prodhimit të Seedance përfaqëson një hap të ri në zhvillimin e inteligjencës artificiale gjeneruese.
“Për herë të parë, nuk duket si një video e bërë nga IA, por si një prodhim i vërtetë filmik,” thotë Jan-Willem Blom nga studioja krijuese Videostate. Sipas tij, ndryshe nga modele të tjera perëndimore që krijojnë pamje mbresëlënëse, Seedance arrin të kombinojë tekstin, imazhin dhe audion në një sistem të vetëm funksional.
Ashtu si Midjourney apo Sora e OpenAI, Seedance mund të gjenerojë video nga një tekst i shkurtër, por në disa raste mjafton një përshkrim minimal për të prodhuar klip me cilësi të lartë. Studiuesja e etikës së inteligjencës artificiale Margaret Mitchell thekson se forca e tij qëndron pikërisht në integrimin e elementeve të ndryshme krijuese brenda një platforme të vetme.
Një nga testet që përdoret për të matur përparimin e teknologjisë është krijimi i një videoje të Will Smith duke ngrënë spageti – një shembull që qarkullon prej kohësh në komunitetin e IA-së. Seedance jo vetëm që krijon një version jashtëzakonisht realist të aktorit, por edhe video virale ku ai përballet me një “përbindësh spageti”, me estetikë që i ngjan një filmi me buxhet të madh.
Sipas David Kwok, drejtues i studios së animacionit Tiny Island Productions në Singapor, sekuencat komplekse të aksionit të prodhuara nga Seedance duken më realiste se ato të konkurrentëve. “Ndihesh sikur pas kamerës është një drejtor fotografie i specializuar në filma aksioni,” thotë ai.
Por suksesi teknik ka sjellë edhe polemika. Çështjet e të drejtave të autorit po bëhen gjithnjë e më të mprehta, ndërsa kritikët paralajmërojnë se kompanitë e inteligjencës artificiale po përdorin të dhëna pa kompensuar krijuesit origjinalë, duke i dhënë përparësi zhvillimit teknologjik mbi interesat e artistëve.
Në një plan më të gjerë, Seedance po e vendos sërish Kinën në qendër të garës globale të inteligjencës artificiale. “Kjo tregon se modelet kineze janë të paktën në të njëjtin nivel me ato më të avancuara në treg,” thotë eksperti Cohney. Ai shton se nëse ByteDance mund të prezantojë një teknologji të tillë, lind pyetja se çfarë tjetër po zhvillohet në laboratorët kinezë.
Vitin e kaluar, modeli kinez DeepSeek tronditi tregun global me një alternativë me kosto të ulët ndaj chatbot-eve perëndimore, duke kaluar përkohësisht ChatGPT si aplikacioni falas më i shkarkuar në SHBA. Pekini e ka vendosur inteligjencën artificiale dhe robotikën në qendër të strategjisë ekonomike, duke investuar në çipa të avancuar, automatizim dhe IA gjeneruese për të fituar avantazh ndaj SHBA-ve.
Ndërsa Seedance 2.0 po bënte bujë ndërkombëtare, kompani të tjera kineze lançuan në heshtje mjete të reja të IA-së përpara festave të Vitit të Ri Hënor. Analistët vërejnë se Festa e Pranverës po shndërrohet gjithnjë e më shumë në një “festival të inteligjencës artificiale”, me miliona përdorues që testojnë aplikacione të reja.
Sipas analistit Bill Bishop, viti 2026 mund të jetë pikë kthese për përdorimin masiv të inteligjencës artificiale në Kinë – jo vetëm për chatbot-et, por edhe për agjentë të automatizuar që kryejnë transaksione, mjete kodimi të integruara në punën e përditshme dhe krijues videosh që përdorin rregullisht IA.
Për Hollywoodin, dilema është e qartë: a është Seedance një mjet i ri krijues apo fillimi i një revolucioni që mund të ndryshojë rrënjësisht industrinë e filmit?
(Burimi: BBC)
