Kjo javё pritet të karakterizohet nga moti i paqëndrueshëm, me alternime mes kthjellimeve, vranësirave dhe reshjeve të herëpashershme të shiut në disa zona të vendit.
Sipas parashikimeve meteorologjike, dita e hënë do të nisë me mot relativisht të qetë në pjesën më të madhe të territorit. Paradite priten kthjellime dhe vranësira të lehta, ndërsa pasdite mund të ketë reshje të dobëta shiu në zonat malore dhe në veri të vendit. Temperaturat do të variojnë nga 6°C në zonat malore deri në 18°C në zonat e ulëta dhe bregdetare.
Gjatë ditës së martë dhe të mërkurë, moti pritet të jetë më i paqëndrueshëm. Parashikohen vranësira të shpeshta dhe reshje shiu lokale, kryesisht në veri dhe në qendër të vendit, ndërsa në jug reshjet do të jenë më të pakta. Temperaturat do të mbeten relativisht të qëndrueshme, me vlera që do të luhaten nga 7°C deri në 19°C.
Në pjesën e dytë të javës, nga e enjtja deri të premten, pritet një përmirësim gradual i motit. Vranësirat do të pakësohen dhe do të rikthehen periudhat me diell, ndërsa reshjet do të jenë të izoluara. Temperaturat do të shënojnë një rritje të lehtë, duke arritur deri në 20°C në disa qytete të vendit.
Meteorologët bëjnë të ditur se, megjithëse jemi në mesin e marsit dhe temperaturat po rriten gradualisht, moti pranveror do jetё i paqëndrueshёm, me reshje të herëpashershme dhe ndryshime të shpejta të kushteve atmosferike gjatë javës.
Qytetarët këshillohen të ndjekin përditësimet e motit gjatë ditëve në vijim, pasi reshjet lokale dhe era e fortë në disa zona mund të ndikojnë në aktivitetet e përditshme dhe në udhëtime.
