Autoritetet suedeze kanë arrestuar kapitenin rus të një ҫisterne të dyshuar si pjesë e të ashtuquajturës “flotë hije” të Rusisë, një rrjet anijesh që dyshohet se përdoret për të shmangur sanksionet perëndimore ndaj eksporteve ruse të naftës.
Kapiteni 55-vjeçar, emri i të cilit nuk është bërë publik, u arrestua nga Autoriteti Suedez i Prokurorisë dhe u paraqit në gjykatë në qytetin Ystad, pasi dyshohet për përdorim të dokumenteve të falsifikuara.
Anija ҫisternë “Sea Owl One”, me gjatësi rreth 228 metra, u ndalua nga roja bregdetare suedeze ndërsa ndodhej në ujërat territoriale në jug të qytetit Trelleborg. Ajo lundronte nën flamurin e Komoreve, por autoritetet dyshuan se flamuri mund të ishte i rremë.
Sipas rojës bregdetare suedeze, ndërhyrja u bë pasi u zbulua se anija nuk figuronte në regjistrin zyrtar të anijeve të Komoreve, çka mund të përbëjë shkelje të ligjit ndërkombëtar. Dyshimet u shtuan më tej kur kapiteni paraqiti dokumente që autoritetet besojnë se mund të jenë të falsifikuara.
Ҫisterna ishte në një listë të anijeve të sanksionuara nga Bashkimi Europian dhe po udhëtonte nga Santos në Brazil drejt Primorskut në bregdetin baltik të Rusisë. Sipas autoriteteve suedeze, anija kishte transportuar naftë mes Rusisë dhe Brazilit edhe në vitet e fundit.
Ambasada ruse në Suedi deklaroi se 10 nga 24 marinarët në bord janë shtetas rusë, përfshirë kapitenin, ndërsa pjesa tjetër janë nga Indonezia. Ambasada tha se po e ndjek nga afër situatën.
Kjo është hera e dytë brenda një jave që Suedia sekuestron një anije të dyshuar si pjesë e flotës hije të Rusisë. Më 6 mars, roja bregdetare mori kontrollin e një anijeje mallrash me flamur të Guinesë, e quajtur “Caffa”, e cila dyshohej se transportonte drithëra të vjedhura nga Ukraina.
Sanksionet perëndimore ndaj Rusisë janë vendosur pas pushtimit të plotë të Ukrainës në vitin 2022, duke synuar kryesisht eksportet e naftës, një nga burimet kryesore të të ardhurave për financimin e luftës.
Sipas ekspertëve, Moska është mbështetur gjithnjë e më shumë në një rrjet ҫisternash me pronësi dhe sigurim të paqartë, të njohur si “flota hije”, për të vazhduar eksportin e naftës dhe për të shmangur kufizimet ndërkombëtare. Disa prej këtyre anijeve janë akuzuar gjithashtu për manipulim të sinjaleve të vendndodhjes, sabotim të kabllove nënujore dhe përdorim dronësh.
(Burimi: BBC)
