Partia Demokratike ka nisur zyrtarisht procesin e saj të brendshëm organizativ që do të kulmojë me zgjedhjen e kryetarit të partisë dhe mbledhjen e Kuvendit Kombëtar. Vendimet u morën në mbledhjen e sotme të Kryesisë së PD-së, ku u përcaktua edhe kalendari i zgjedhjeve brenda strukturave të partisë.
Sipas informacioneve nga mbledhja, procesi zgjedhor në degët e Partisë Demokratike do të përfundojë deri më 30 prill, ndërsa më 23 maj do të zhvillohet votimi për zgjedhjen e kryetarit të partisë. Vetëm dy javë më pas, më 6 qershor, demokratët do të mblidhen në Kuvendin Kombëtar, forumi më i lartë vendimmarrës i PD-së.
Zhvillimet brenda partisë vijnë në një moment kur opozita ka intensifikuar protestat dhe aksionin politik në rrugë. Megjithatë, paralelisht me këtë presion publik, në selinë blu po përgatitet edhe procesi formal i rikonfirmimit të drejtimit të partisë.
Në këtë kontekst, zgjedhjet e 23 majit pritet të jenë më shumë një proces konfirmues për lidershipin aktual, ndërsa Kuvendi i 6 qershorit mund të shoqërohet edhe me ndryshime në statut dhe riorganizim të strukturave të partisë.
Në mbledhjen e sotme u vendos gjithashtu ngritja e një grupi pune për rishikimin e statutit të Partisë Demokratike, i cili do të drejtohet nga Gazment Bardhi.
Grupi për rishikimin e statutit përbëhet nga:
- Gazment Bardhi – Kryetar
- Oerd Bylykbashi – Anëtar
- Ivi Kaso – Anëtar
- Gent Strazimiri – Anëtar
- Enno Bozdo – Anëtar
- Elda Hoti – Anëtar
- Keltis Kruja – Anëtar
- Adriana Kalaja – Anëtar
- Marash Logu – Anëtar
- Franc Nuri – Anëtar
Vendimet e sotme hapin zyrtarisht fazën e re organizative brenda Partisë Demokratike, ku krahas aksionit opozitar në rrugë, drejtimi i partisë pritet të vuloset përmes procesit të brendshëm zgjedhor.
