Susie Wiles, shefja e kabinetit në Shtëpinë e Bardhë dhe një nga figurat më të rëndësishme në administratën e presidentit Donald Trump, ka bërë të ditur se është diagnostikuar me kancer në gji.
Wiles, 68 vjeç, konfirmoi se sëmundja është zbuluar në një fazë të hershme dhe se prognoza është pozitive. Ajo theksoi se do të vijojë detyrën e saj pa ndërprerje dhe nuk planifikon të marrë leje nga puna, ndërsa do të nisë trajtimin në javët në vijim në zonën e Uashingtonit.
“Në Shtetet e Bashkuara, pothuajse një në tetë gra përballet me këtë diagnozë. Çdo ditë, këto gra vazhdojnë të rrisin familjet, të punojnë dhe të shërbejnë në komunitetet e tyre me forcë dhe vendosmëri. Tani jam edhe unë pjesë e tyre,” tha Wiles në një deklaratë.
Ajo shtoi se është mirënjohëse ndaj ekipit të mjekëve që e zbuluan sëmundjen në kohë dhe po e udhëheqin në trajtim, ndërsa shprehu besim për ecurinë e mirë të saj shëndetësore.
Wiles bëri të ditur gjithashtu se e kishte informuar presidentin Trump për diagnozën menjëherë pasi e mësoi javën e kaluar dhe falënderoi për mbështetjen e tij gjatë kësaj periudhe.
Nga ana e tij, Donald Trump reagoi publikisht duke e cilësuar Wiles si “një nga njerëzit më të fortë” që njeh. Ai theksoi se ajo do të vazhdojë të jetë pothuajse me kohë të plotë në Shtëpinë e Bardhë gjatë trajtimit.
“Forca dhe përkushtimi i saj për të vazhduar punën që e do dhe e bën shumë mirë, edhe gjatë trajtimit, tregojnë gjithçka për karakterin e saj,” u shpreh Trump, duke shtuar se ai dhe bashkëshortja e tij Melania janë pranë saj në këtë periudhë.
Wiles nuk ka dhënë detaje mbi trajtimin që do të ndjekë, por në vitet e fundit janë bërë përparime të rëndësishme në trajtimin e kancerit të gjirit, sidomos kur ai zbulohet herët.
Sipas të dhënave të Institutit Kombëtar të Shëndetit në SHBA, rreth 300 mijë gra diagnostikohen çdo vit me kancer në gji.
Susie Wiles konsiderohet një figurë kyçe në rrethin e ngushtë të Trump. Ajo ka drejtuar operacionet politike të tij dhe fushatën që e riktheu në Shtëpinë e Bardhë në vitin 2024.
Gjatë kësaj periudhe, ajo ishte gjithashtu pranë presidentit edhe në momentin kur ai u plagos në një atentat gjatë një tubimi elektoral në Pensilvani në korrik të vitit 2024.
Pavarësisht diagnozës, Wiles ka bërë të qartë se do të vijojë të mbajë rolin e saj në administratë, duke garantuar vazhdimësinë e punës në Shtëpinë e Bardhë gjatë trajtimit.
