Një tjetër goditje e rëndë ka tronditur elitën politike dhe ushtarake të Iranit, teksa Izraeli ka ndërmarrë dy operacione të njëpasnjëshme në zemër të Teheranit, duke eliminuar dy figura kyçe të regjimit.
Sipas burimeve zyrtare izraelite, në një sulm ajror është vrarë Ali Larijani, një nga emrat më me ndikim në strukturën e pushtetit iranian dhe i konsideruar për vite me radhë si një nga njerëzit më të afërt me udhëheqësin suprem Ali Khamenei.
Larijani u godit ndërsa ndodhej në një apartament në Teheran, që sipas raportimeve përdorej si strehë. Në momentin e sulmit ai ishte së bashku me djalin e tij. Operacioni, sipas mediave izraelite, kishte qenë i planifikuar prej kohësh, por ishte shtyrë në momentet e fundit, deri sa inteligjenca arriti ta lokalizonte saktësisht.
Vrasja e tij konsiderohet një goditje direkte në nivelet më të larta të vendimmarrjes në Iran. Larijani kishte mbajtur poste kyçe për dekada: nga kryenegociator bërthamor në vitet 2005–2007, te kryetar i parlamentit për 12 vite radhazi, deri te posti i fundit si sekretar i Këshillit Suprem të Sigurisë Kombëtare, një nga organet më të rëndësishme të sigurisë në vend.
Ai shihej si një “konservator i moderuar”, por gjithsesi pjesë e ngushtë e bërthamës së pushtetit, me ndikim të drejtpërdrejtë në politikat strategjike të Republikës Islamike.
Paralelisht me këtë operacion, një tjetër figurë e rëndësishme është eliminuar po në kryeqytetin iranian. Bëhet fjalë për Gholam Reza Soleimani, komandant i organizatës paraushtarake Basij, e njohur për rolin e saj në kontrollin e brendshëm dhe shtypjen e protestave.
Soleimani kishte drejtuar Basij për gjashtë vite dhe konsiderohej një nga njerëzit kyç në menaxhimin e pakënaqësive popullore, sidomos gjatë protestave antiqeveritare, ku janë raportuar arrestime masive, dhunë dhe rrëfime të detyruara.
Basij është pjesë e strukturës së fuqishme të Gardës Revolucionare Islamike (IRGC), një organizatë që ka ndikim të madh jo vetëm në sigurinë, por edhe në ekonominë dhe politikën e Iranit, dhe që i përgjigjet drejtpërdrejt udhëheqjes supreme.
E themeluar në vitin 1979 nga Ajatollah Ruhollah Khomeini, kjo forcë është kthyer me kalimin e viteve në një instrument thelbësor për ruajtjen e regjimit dhe shtypjen e çdo forme kundërshtimi.
Eliminimi i dy figurave brenda një harku të shkurtër kohor shihet si një përshkallëzim i fortë i operacioneve izraelite dhe një goditje e dyfishtë ndaj strukturave politike dhe të sigurisë së Iranit.
Deri më tani nuk ka një reagim zyrtar nga autoritetet iraniane, ndërsa tensionet në rajon pritet të rriten edhe më tej pas këtyre zhvillimeve.
