Në përfundim të muajit të bekuar të Ramazanit, Komuniteti Mysliman i Shqipërisë ka njoftuar organizimin e ceremonisë qendrore të Fitër Bajramit në Tiranë, ku mijëra besimtarë pritet të mblidhen në Sheshin “Skënderbej” për faljen e namazit.
Sipas njoftimit zyrtar, namazi i Fitër Bajramit do të falet më 20 mars 2026, në orën 06:30, në një nga hapësirat më simbolike të kryeqytetit, duke ruajtur traditën e viteve të fundit për organizimin e kësaj feste në një ambient të hapur dhe gjithëpërfshirës.
Programi i ceremonisë do të nisë në orën 06:00 me hapjen zyrtare, për të vijuar me lexim nga Kur’ani nga imami i xhamisë “Et’hem Beu”, Elton Karaj. Më pas, të pranishmit do të përshëndeten nga Kryetari i Komunitetit Mysliman të Shqipërisë, H. Bujar Spahiu, ndërsa një ligjëratë do të mbahet nga nënkryetari i këtij institucioni, Lauren Luli.
Kulmi i ceremonisë do të jetë falja e namazit të Bajramit në orën 06:30, e cila do të drejtohet nga vetë kreu i KMSH-së, H. Bujar Spahiu. Menjëherë pas saj, hutbeja e Bajramit do të mbahet nga Myftiu i Tiranës, Bilal Teqja.
Komuniteti Mysliman i Shqipërisë ka ftuar besimtarët që, brenda mundësive, të pajisen me sixhade për të qenë sa më komod gjatë faljes në ambient të hapur.
Në mesazhin e tij, KMSH uron të gjithë besimtarët për këtë festë të rëndësishme, duke lutur që agjërimi, adhurimet dhe lutjet e muajit të Ramazanit të jenë pranuar.
Fitër Bajrami mbetet një nga momentet më të rëndësishme shpirtërore për besimtarët myslimanë, një festë që simbolizon sakrificën, solidaritetin dhe mirënjohjen pas një muaji përkushtimi.
