Boksierja tajvaneze Lin Yu-ting, fituese e medaljes së artë në Lojërat Olimpike Paris 2024, është lejuar të rikthehet në ring pas një shqyrtimi të plotë mbi kriteret e saj biologjike për pjesëmarrje në kategorinë e femrave.
Vendimi u bë publik nga World Boxing, organi që aktualisht drejton boksin në nivel olimpik, vetëm pak ditë para nisjes së Kampionatit Aziatik të Boksit që do të zhvillohet më 29 mars në Mongoli.
Rasti i Lin Yu-ting kishte tërhequr vëmendje ndërkombëtare që nga Olimpiada e Parisit, ku ajo dhe boksierja algjeriane Imane Khelif fituan medalje ari mes debatesh të forta mbi identitetin biologjik dhe kriteret e pjesëmarrjes. Edhe pse të dyja përmbushnin rregullat e Komitetit Olimpik Ndërkombëtar në atë kohë, suksesi i tyre ndezi një debat të politizuar në sport.
Pas marrjes së drejtimit të sportit, World Boxing vendosi në gusht një rregull të ri: çdo sportist duhet t’i nënshtrohet një testi gjenetik një herë në jetë, për të identifikuar praninë e kromozomit Y.
Si pasojë, Lin mungoi në disa gara ndërkombëtare gjatë kësaj periudhe. Organizata nuk publikoi rezultatet konkrete të testit, por konfirmoi se Federata e Boksit e Tajvanit kishte ndjekur një proces apelimi për një nga sportistet e saj.
Në një deklaratë zyrtare, sekretari i përgjithshëm i World Boxing, Tom Dielen, theksoi se procesi ka qenë i vështirë për sportisten, por është ndjekur në mënyrë të rregullt dhe transparente, për të garantuar sigurinë dhe integritetin e sportit.
Ndërkohë, federata tajvaneze e cilësoi vendimin si një “lehtësim të madh”, duke deklaruar se ekspertët mjekësorë të pavarur kanë konfirmuar se Lin Yu-ting është femër që nga lindja.
Pas këtij vendimi, kampionia olimpike pritet të bëjë rikthimin e shumëpritur në ring në Kampionatin Aziatik, duke i dhënë fund një periudhe pasigurie dhe polemikash.
Nga ana tjetër, edhe Imane Khelif nuk ka garuar në evente të organizuara nga World Boxing që prej vendosjes së rregullave të reja, por ka shprehur dëshirën për t’u rikthyer dhe planifikon debutimin në boksin profesionist në muajt në vijim.
Debati mbi kriteret biologjike në sport nuk është i ri. Testimet e kromozomeve kanë qenë të zakonshme në shekullin XX, por u braktisën në vitet ’90 për shkak të kompleksitetit dhe rasteve të shumta që nuk mund të kategorizoheshin lehtësisht.
Megjithatë, rastet si ai i Lin Yu-ting tregojnë se çështja mbetet e hapur dhe vazhdon të sfidojë balancën mes drejtësisë sportive dhe përfshirjes.
(Burimi: Al Jazeera)
