Edi Rama prezantoi në Asamblenë e Partisë Socialiste një riorganizim të fortë të partisë, me fokus të veçantë Tiranën. Riorganizimi thuajse ushtarak krijon përshtypjen se po përgatitet për zgjedhje më të rëndësishme se ato vendoret të vitit 2027.
A mund të jetë një përgatitje për zgjedhje totale në 2027? Kjo mbetet për t’u parë. Por lëvizja e fortë e tij riorganizuese është një premisë e qartë që Edi Rama po përgatitet për zgjedhje “finale”.
Tirana, kështjellë dhe kalë beteje
Tirana, hambar i votave në rang kombëtar, ka në “barkun” e saj një hambar tjetër, njësinë nr. 5.
Në këtë njësi Rama vendos “3 mosketierët” e mbledhjes së votave: Erion Braçe, Taulant Balla dhe Fatmir Xhafaj.
Secili prej tyre në zgjedhjet e fundit “korri” në total 59,128 vota, kur Rama dy prej tyre i vendosi në garë me mandatin personal.
Njësia 5 një zonë me 72,000 votues tashmë do ketë tre “ustallarë” të votës, të cilët do bashkëpunojnë për të mbajtur në pushtet “Skënderbeun” e Elisa Spiropalit. Kjo e fundit, u caktua nga Rama të mbulojë njësinë administrative nr. 13, që quhet njësia e oligarkëve, pasi përfshin vilat e Farkës, të Kodrës së Diellit dhe Liqenit të Thatë.
Në zgjedhjet e fundit, Braçe aludoi publikisht se po i “vidhnin” të tijët vota në njësinë që mbulonte, njësinë 5. “Hajduti” ishte as më shumë e as më pak, Fatmir Xhafaj. Në krahun tjetër, Taulant Balla, ish ministёr i Brendshëm (2023-2024), disa bashkëpunëtorë të ish ministrit të Brendshëm (2017-2018), i largoi nga radhët e policisë dhe kjo nuk krijoi as më shumë e as më pak, por armiqësi.
Megjithatë, BBF-ja e Ramës në Tiranë, ka rastin të tregojë para tij, nëse janë gati të gëlltisin urrejtjen mes tyre, për dashuri pa kushte për të.
Emra të tjerë të zhvendosur apo të vendosur si drejtues në qarqe dhe në kryeqytet janë disa.
Lista e drejtuesve në njësitë e Tiranës:
Njësia 1: Lindita Nikolla
Njësia 3: Iris Luarasi dhe Edona Bilali
Njësia 4: Damian Gjiknuri dhe Blerina Gjylameti
Njësia 5: Erion Braçe, Taulant Balla, Fatmir Xhafaj
Njësia 6: Albana Koçiu, Endrit Yzeiraj, Megi Fino
Njësia 7: Sofjan Jaupaj dhe Enkelejd Musabelliu
Njësia 8: Igli Hasani dhe Vilma Premti
Njësia 9: Ogerta Manastirliu dhe Olti Muzaka
Njësia 10: Besfort Lamallari
Njësia 11: Eduard Shalsi
Njësia 13: Anila Denaj dhe Elisa Spiropali
Drejtuesit politikë në qarqe:
Tiranë: Ogerta Manastirliu dhe Taulant Balla
Dibër: Ulsi Manja
Berat: Ervin Demo
Gjirokastër: Mirela Kumbaro
Lezhë: Ermal Nufi
Elbasan: Arbjan Mazniku
Kukës: Erjon Malaj
Shkodër: Enea Karakaçi
Korçë: Niko Peleshi
Vlorë: Bledi Çuçi
Durrës: Blendi Klosi
Fier: Belinda Balluku
Lëvizjet e Ramës duken të lidhura si riorganizim politik brenda partisë, forcim strukturash në terren dhe paralelisht të shoqëruara me një instrument të ri – referendumin që ai e prezantoi bashkë me “ushtarët” politikë.
Në Tiranë, vihet re një largim nga zonat e djathta, duke lënë ushtarë politikë pa rëndësi.
Besfort Lamallari në njësinë 10, Igli Hasani dhe Vilma Premti në njësinë 8 apo Eduard Shalsi në njësinë 11, janë tregues për këtë “shitje” zonash me vota blu.
Drejtuese politike e qarkut Fier, kampion mandatesh dhe votash mbetet Belinda Balluku.
Kjo moslëvizje ka dy shpjegime: ose Balluku ka siguri që do dalë e pafajshme shumë më shpejt se sa vjen 2027-ta, ose zhvendosja e saj nga Fieri sot, do krijonte një pasojë të pariparueshme për nesër.
Socialistët u mobilizuan sot. Po demokratët ç’do bëjnë? Mbetet për t’u parë…
