4000 kilometra larg ishullit Diego Garcia në Oqeanin Indian – Irani lëshon dy raketa kundër një baze ushtarake të përbashkët të SHBA-së dhe Britanisë së Madhe, duke ngritur alarmin në të gjithë Perëndimin për kapacitetet e reja ushtarake të Teheranit.
Sulmi, i konfirmuar nga burime ushtarake, shënon herën e parë që Irani përdor raketa me rreze kaq të gjatë që nga nisja e konfliktit aktual. Edhe pse asnjë prej raketave nuk goditi objektivin – njëra dështoi gjatë fluturimit dhe tjetra u interceptua nga një anije luftarake amerikane – mesazhi ishte i qartë: Irani tashmë ka aftësinë të godasë objektiva në distanca deri në 4,000 kilometra.
Kjo distancë vendos potencialisht në rrezik disa nga kryeqytetet kryesore evropiane, përfshirë Londrën, Parisin dhe Berlinin. Ushtria izraelite paralajmëroi se regjimi iranian përbën një “kërcënim global”, duke theksuar se teknologjia e re raketore mund të ndryshojë ekuilibrat e sigurisë në rajon dhe më gjerë.
Sulmi erdhi menjëherë pasi Irani kishte paralajmëruar se “jetët britanike janë në rrezik”, si përgjigje ndaj vendimit të Londrës për të lejuar përdorimin e bazës Diego Garcia nga SHBA-të për operacione ushtarake. Ky zhvillim shihet si një përshkallëzim i drejtpërdrejtë i përfshirjes së Britanisë në konflikt.
Teherani deklaroi më pas se ka “dominim raketor” dhe se taktikat e reja ushtarake do të lënë të befasuar SHBA-në dhe Izraelin. Në të njëjtën kohë, zyrtarë iranianë kanë paralajmëruar se edhe destinacionet turistike dhe zonat civile mund të jenë objektiva të mundshëm.
Ndërkohë, arsenali iranian përfshin raketa si Shahab-3 me rreze deri në 1,300 km dhe Khorramshahr që mendohet të arrijë deri në 3,000 km – por sulmi i fundit sugjeron se kapacitetet reale mund të jenë edhe më të mëdha se sa është menduar më parë.
Reagimi ndërkombëtar ka qenë i menjëhershëm. Britania e Madhe e ka cilësuar sulmin si një kërcënim serioz për interesat e saj dhe të aleatëve, ndërsa avionë luftarakë dhe mjete të tjera ushtarake janë vendosur në gatishmëri për të mbrojtur personelin në rajon.
Në sfond, tensionet janë rritur edhe më shumë pas kritikave të ashpra të presidentit amerikan Donald Trump ndaj aleatëve të NATO-s, të cilët ai i akuzoi për mungesë mbështetjeje në përpjekjet për të rihapur Ngushticën e Hormuzit.
Ndërsa konflikti thellohet, sulmi ndaj Diego Garcia shënon një moment kritik: një sinjal i fortë se lufta nuk është më e kufizuar vetëm në Lindjen e Mesme, por ka potencial të prekë drejtpërdrejt edhe Evropën.
(Burimi: The Sun)
