Ngushtica e Hormuzit mbetet e hapur për të gjithë përveç “armiqve” të Iranit, deklaroi përfaqësuesi i Iranit në agjencinë detare të OKB-së, sot në orët e para të mëngjesit, menjëherë pasi Presidenti i SHBA-së Donald Trump, me një status në rrjetin e tij “Truth”, i dha Teheranit afat kritik 48 orë për të hapur rrugën ujore “pa kushte”.
Irani e mban të bllokuar prej 24 ditësh ngushticën e Hormuzit, ku kalojnë anijet që transportojnë 20% të furnizimit botëror me naftë, duke shkaktuar, për pasojë, një kaos dhe rritje të çmimeve të karburantit në gjithë botën.
“Ngushtica e Hormuzit është e hapur për të gjithë përveç ‘armiqve'”, deklaroi Ali Mousavi, përfaqësuesi i Iranit në Organizatën Ndërkombëtare Detare (IMO), sipas agjencisë së lajmeve “Mehr”, duke shtuar se “siguria e anijeve dhe ekuipazheve të tyre kërkon koordinim me autoritetet iraniane”.
Mousavi tha se Teherani është gati të koordinohet me IMO-n dhe vendet e tjera joarmiqësore për të përmirësuar sigurinë detare dhe për të mbrojtur detarët.
Mousavi deklaroi se diplomacia mbetet përparësia kryesore e Iranit, megjithëse “një ndërprerje e plotë e agresionit dhe besimi dhe siguria e ndërsjellë janë më thelbësore”.
“Loja” me ngushticën e Hormuzit duket se diktohet nga Irani, që e mban në “grykën e topave” vijën e ngushtë ujore që kalojnë në kufijtë e tij gjeografikë.
Kërcënimi i Trump jo vetëm që nuk po konsiderohet nga Irani, por ka marrë një përgjigje të së njëjtës gjuhë force: “Nëse SHBA godet infrastrukturën energjetike të Iranit, atëherë do goditet e gjithë infrastruktura ujore dhe energjetike e rajonit në Lindjen e Mesme”.
Kjo përgjigje dhe vendosja e rregullave për kalimin e të gjithëve, vetëm të “armiqve” jo, tregon një përshkallëzim dhe siguri ekstreme të Iranit për vazhdimin e luftës, një shenjë aspak e mirë për mbylljen e konfliktit që tashmë po prek muajin e plotë të fillimit të tij.
