Policia e Tiranës ka njoftuar masa të posaçme për mbarëvajtjen e protestës që do të zhvillohet sot në orën 18:00 përpara Kryeministrisë, duke paralajmëruar edhe kufizime të rëndësishme në qarkullimin e automjeteve.
Sipas njoftimit zyrtar, disa nga akset kryesore në kryeqytet do të bllokohen për disa orë, duke nisur që nga mëngjesi i sotëm.
Konkretisht, nga ora 09:30 do të bllokohet lëvizja në bulevardin “Dëshmorët e Kombit”, në segmentin nga Ura deri te kryqëzimi me rrugën “Ismail Qemali”, dhe ky kufizim do të vijojë deri në përfundim të tubimit.
Ndërkohë, duke filluar nga ora 15:00, do të bllokohen edhe rrugët “Ukraina e Lirë”, “Papa Gjon Pali II” dhe “Ismail Qemali”.
Policia bën me dije se, në varësi të situatës në terren dhe zhvillimit të protestës, mund të ketë kufizime të tjera të përkohshme edhe në rrugë të tjera përreth zonës.
Për të lehtësuar lëvizjen e qytetarëve, autoritetet kanë parashikuar devijime të trafikut në akse alternative dhe u bëjnë thirrje drejtuesve të automjeteve të planifikojnë lëvizjet paraprakisht.
Në fund, Policia e Tiranës apelon për mirëkuptim dhe bashkëpunim nga qytetarët, si dhe kërkon që të shmangen çdo situatë që cenon rendin dhe sigurinë publike gjatë zhvillimit të protestës.
