Për vite me radhë, Presidenti Donald Trump ka bërë komente të ashpra dhe të pandjeshme për njerëzit që kanë vdekur – veçanërisht armiqtë e tij.
Por dje, ai festoi hapur vdekjen e ish-drejtorit të FBI-së Robert Mueller, duke shkruar: “Jam i lumtur që vdiq”.
Në rolin e hetuesit special të Departamentit të Drejtësisë, ish-drejtori i FBI-së Robert Mueller hetoi Trumpin dhe fushatën e tij të vitit 2016, si dhe lidhjet e dyshuara me Rusinë gjatë mandatit të parë presidencial.
“Robert Mueller sapo vdiq”, postoi Trump në mediat sociale menjëherë pasi vdekja u konfirmua nga familja e të ndjerit. “Mirë, jam i lumtur që vdiq. Tashmë ai nuk mund të lëndojë më njerëz të pafajshëm!”.
Kush ishte Robert Mueller që Trump e urrente kaq shumë?
Robert Swan Mueller III ishte një nga figurat më të respektuara në sistemin e drejtësisë amerikane. I lindur në vitin 1944, ai pati një karrierë të gjatë në shërbim publik, duke nisur fillimisht si oficer në Trupat e Marinës së SHBA-së gjatë Luftës së Vietnamit, ku u dekorua për shërbimin e tij.
Pas kthimit në SHBA, ai u diplomua në drejtësi dhe ndërtoi një karrierë të spikatur si prokuror federal. Mueller u bë i njohur për qasjen e tij të rreptë ndaj krimit të organizuar, terrorizmit dhe korrupsionit.
Në vitin 2001, ai u emërua drejtor i FBI-së vetëm pak ditë para sulmeve terroriste të 11 shtatorit. Ai drejtoi agjencinë për 12 vite – një mandat i zgjatur përtej afatit normal për shkak të besimit të lartë nga të dyja partitë politike – duke mbikëqyrur transformimin e FBI-së në një agjenci më të fokusuar në luftën kundër terrorizmit global.
Pas largimit nga FBI, Mueller u rikthye në qendër të vëmendjes në vitin 2017, kur u emërua hetues special për të drejtuar hetimin mbi ndërhyrjen e Rusisë në zgjedhjet presidenciale të vitit 2016 dhe lidhjet e mundshme me fushatën e Donald Trump. Hetimi i tij, që zgjati afro dy vite, prodhoi një raport voluminoz dhe çoi në disa akuza penale ndaj bashkëpunëtorëve të Trump, duke e vendosur atë në qendër të përplasjes politike në SHBA.
Pikërisht ky rol e bëri Mueller një nga figurat më të kontestuara për Trumpin dhe mbështetësit e tij, të cilët e akuzuan shpesh për një hetim të motivuar politikisht – akuza që ai i mohoi vazhdimisht, duke theksuar pavarësinë e punës së tij.
Një model i përsëritur reagimesh të ashpra
Reagimi i Trump ndaj vdekjes së Mueller nuk ёshtё i papritur. Gjatë viteve, ai ka bërë deklarata të forta edhe për figura të tjera pas ndarjes së tyre nga jeta, përfshirë senatorin John McCain, ish-sekretarin e shtetit Colin Powell dhe politikanë të tjerë që kishin qenë kritikë ndaj tij.
Por këtë herë, toni ishte edhe më i drejtpërdrejtë dhe i pazakontë: presidenti amerikan jo vetëm kritikoi një kundërshtar të ndjerë, por shprehu hapur kënaqësi për vdekjen e tij.
Kjo deklaratë pritet të ndezë reagime të forta në opinionin publik dhe në arenën politike, duke rihapur debatin mbi gjuhën dhe standardet e komunikimit në nivelet më të larta të pushtetit në SHBA.
Në një klimë tashmë të polarizuar, rasti Mueller duket se thellon edhe më shumë ndarjet – duke treguar se përplasjet politike në Amerikë nuk ndalen as përballë vdekjes.
