Nga kontrasT.al
Pas 2 orë e 30 minuta marshimi nëpër kryeqytet, me të njëjtin numër demonstruesish; të njëjtin dekor “luftarak”; të njëjtin grup deputetësh, të udhëhequr nga lideri i moshuar demokrat – protesta përfundoi!
Sali Berisha në mbarim të saj përsëriti mot a mot fjalitë e protestës paraardhëse: Le të vazhdojmë këtë betejë deri në fitoren e plotë. Edhe një herë mirënjohje ndaj jush… vazhdojmë betejën. Fitorja është e jona!
Por para përmbylljes së përsëritur, ai zbukuroi me ekzaltim këtë radhë, ndryshe nga të tjerat kur tha “Sot ne fituam një betejë. Zhvilluam betejën më të bukur në tërë ekzistencën tonë… por më madhështore do jetë ajo që vjen… do e njoftojmë!”
Me këpucë të lehta, kundragaz, çadër dhe shumë bodyguardё që përkujdesen për të, Sali Berisha tërhoqi për të disa të disatën herë në rrugët e Tiranës, një duzinë populli të sinqertë demokrat. Ata, të palodhur, edhe pse e dinin që Edi Rama dhe të tijët nuk do binin sot, përsëritën tubimin e tyre paqësor.
Paqësor edhe pse fishekzjarret, molotovët, sharjet apo përplasjet me skafandrat e policisë mund të duken nga ekranet dhe fotot internacionale si dhunë dhe “hata” në sheshet e Tiranës. Nuk është e vërtetë!
Paqja me 6 policë të plagosur, 10 protestues tё arrestuar, disa sy të lotuar dhe ezofagë të acaruar, u vendos edhe sot në mbrëmje ndërmjet pozitës me ujëhedhëse dhe opozitës me molotovë.
Loja “kuka – fshehti” e demonstruesve me policët vazhdoi si herët e tjera; marshim nga sheshi i “molotovëve” – kryeministria, tek ministria e Ballukut, bashkia e Veliajt, prapa kthehu në bulevard, më pas në “xhaminë” PD.
Një tentativë për të “përvëluar” godinën e partisë së Ramës përfundoi pa sukses, me ndotjen vetëm të mureve të Bankës së Shqipërisë.
E njëjta situatë te rrugë parkimi para Kuvendit të Shqipërisë. Aty përsëri policët u përplasën me tre deputetë agresivë të PD-së. Një incident i vogël, ca sharje rruge por asgjë me zarar. Një tentativë për të “martirizuar” liderin e opozitës me spray socialist përfundoi pa dëme të rëndësishme shëndetësore ndaj tij.
Nuk është ky qëllimi: përfundimi i protestave me viktima që do hidhnin për tokë qeverinë. Ato duhet të vazhdojnë dhe vazhdojnë deri kur zgjidhja PS-PD të vijë në ekranet kombëtare dhe ndërkombëtare.
Deri për atëherë, lideri i opozitës u përbetua: “S’ka paqe me Edi Ramën … një mirënjohje të pakufijshme ndaj jush. Ishte një demonstratë e shkëlqyer, që tejkaloi çdo lloj projekti. Tjetra do jetë edhe më madhështore… edhe më e shkëlqyer.”
Le të presim herën tjetër, protestën tjetër, me shpresë se “mallkimi” i opozitës do përfundojë.
© Ky është shkrim ekskluziv i kontrasT.al, i cili gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar burimin e tij.
