Dhjetëra mijëra dollarë nga taksapaguesit amerikanë janë shpenzuar për shërbime grimi, stilimi flokësh dhe madje edhe për një kalë, në kuadër të një reklame promovuese ku shfaqej ish-sekretarja e Sigurisë Kombëtare, Kristi Noem, përpara monumentit të Mount Rushmore.
Sipas faturave të siguruara nga CNN, rreth 20 mijë dollarë janë paguar për një kalë nga një trajner në Dakotën e Jugut, ndërsa afro 4 mijë dollarë të tjera janë shpenzuar për shërbime estetike. Reklama u realizua nga një nënkontraktor i Departamentit të Sigurisë Kombëtare, Strategy Group, dhe dokumentet janë bërë publike pas kërkesës së senatorëve Peter Welch dhe Richard Blumenthal.
Ironikisht, Noem kishte premtuar më herët se do të luftonte shpenzimet e panevojshme brenda institucionit që drejtonte. Megjithatë, gjatë mandatit të saj, departamenti shpenzoi mbi 200 milionë dollarë për fushata reklamuese, shumë prej të cilave e kishin atë në qendër.
Këto shpenzime u kthyen në objekt debatesh edhe në Kongres, ku Noem deklaroi se presidenti Donald Trump kishte miratuar fondet. Por vetë Trump e mohoi këtë, dhe pak kohë më pas njoftoi largimin e saj nga posti, duke propozuar senatorin Markwayne Mullin si zëvendësues.
Faturat tregojnë gjithashtu se kompania Strategy Group përfitoi mbi 100 mijë dollarë për kosto pune, një bonus nënshkrimi prej 60 mijë dollarësh dhe rreth 50 mijë dollarë të tjera për prodhimin e videos dhe fotografive.
Senatori Welch e cilësoi situatën si “shpërdorim, mashtrim dhe abuzim”, duke theksuar se fondet publike janë përdorur për elementë luksi dhe jo thelbësorë.
Vetё Departamenti i Sigurisë Kombëtare u shpreh se nuk kontrollon mënyrën se si kontraktorët realizojnë shërbimet e tyre, duke shmangur përgjegjësinë direkte për shpenzimet.
Një videoklip 60-sekondësh, që tregon Noem hipur mbi një kalë me kapelë kaubojsi, e kap duke thënë: “E dini pse i dua këto hapësira të gjera? Jo vetëm për bukurinë e tyre, por sepse më kujtojnë paraardhësit tanë që erdhën këtu, në një vend të lirë, që e ofron vetëm Amerika“.
Klipi ndërthur momente kyçe në historinë amerikane me imazhe të Trump, përfshirë edhe tentativën për vrasjen e tij në korrik 2024. Noem, në klip, zotohet të mbrojë lirinë e amerikanëve dhe të arrestojë emigrantët pa dokumente. Ajo e mbyll reklamën e xhiruar mbi kalë me fjalët:
“Dhe nëse vini këtu, ejani në mënyrën e duhur, sepse ëndrra juaj amerikane mund të jetë aq e madhe sa këto qiej të pafund.”
(Burimi: CNN)
