Gjykata e Posaçme Kundër Korrupsionit dhe Krimit të Organizuar (GJKKO) ka refuzuar kërkesën e Ilir Metës për zëvendësimin e masës së sigurisë “arrest me burg”, duke lënë në fuqi qëndrimin e tij në paraburgim, pikërisht në ditën kur ish-presidenti feston 57-vjetorin.
Thelbi i kërkesës së mbrojtjes ishte ofrimi i një garancie pasurore prej 50 mijë eurosh, si alternativë për një masë më të butë sigurie. Avokati Kujtim Cakrani deklaroi se ishte i gatshëm të vinte në dispozicion edhe pasuri personale në emër të Metës. Megjithatë, kjo ofertë nuk u konsiderua e mjaftueshme nga gjykata për të ndryshuar masën ekzistuese.
Vendimi i GJKKO-sё tregon se, për gjykatën, niveli i garancisë apo rrethanat e paraqitura nga mbrojtja nuk e justifikojnë lirimin apo zbutjen e masës, duke lënë të kuptohet se rreziku procedural apo pesha e çështjes mbetet e lartë.
Pas seancës, avokati Cakrani theksoi se beteja ligjore do të vijojë, duke akuzuar gjykatën për vendimmarrje të ndikuar, ndërsa shtoi se Meta ka humbur besimin te sistemi dhe kërkon vetëm gjykim në themel.
Ndërkohë, pikërisht ky proces pritet të nisë javën e ardhshme, ku Ilir Meta, bashkë me Monika Kryemadhin, Fatime Kryemadhin dhe ish-zyrtarë të tjerë, do të përballen me akuzat për pastrim parash, korrupsion dhe fshehje pasurie në lidhje me çështje të bujshme si CEZ-DIA dhe lobimi në SHBA.
Kështu, në vend të një lehtësimi në ditëlindjen e tij, vendimi i sotëm i GJKKO-sё e lë Metën në të njëjtën situatë: në pritje të përballjes në gjykim, por ende pas hekurave.
