Gjykata Kushtetuese e Kosovës ka rrëzuar kërkesën e paraqitur nga kryetarja e Kuvendit, Albulena Haxhiu, së bashku me nëntë deputetë të tjerë të Lëvizjes Vetëvendosje, lidhur me procedurën për zgjedhjen e Presidentit të Republikës.
Në vendimin KO68/26, të publikuar më 30 mars 2026, Gjykata ka vendosur njëzëri të hedhë poshtë kërkesën për vlerësimin e kushtetutshmërisë, si dhe të refuzojë kërkesën për vendosjen e masës së përkohshme.
Kërkesa ishte dorëzuar nga Haxhiu dhe deputetët e mazhorancës pasi opozita bojkotoi një seancë të jashtëzakonshme të Kuvendit, duke mos marrë pjesë në procesin për zgjedhjen e Presidentit.
Përmes kësaj kërkese, ata synonin që Gjykata Kushtetuese të vlerësonte nëse mungesa e deputetëve të opozitës përbënte shkelje të Kushtetutës dhe të detyrimeve të tyre si përfaqësues të zgjedhur.
Megjithatë, vendimi i Gjykatës i jep fund kësaj përpjekjeje, duke mos e konsideruar të bazuar kërkesën dhe duke lënë në fuqi interpretimin aktual të procedurave parlamentare.
Ky zhvillim përbën një goditje për mazhorancën në përpjekjet e saj për të imponuar një lexim të detyrueshëm të pjesëmarrjes së deputetëve në procese të caktuara parlamentare.
