Shifrat e INSTAT për aksidentet rrugore për muajin shkurt na tregojnë edhe një herë më shumë panoramën e frikshme të rrugëve të Shqipërisë dhe rrezikun me të cilin përballen qytetarët çdo ditë. Pas çdo numri fshihen jetë të dëmtuara, familje të prekura dhe një sistem që vazhdon të dështojë në garantimin e sigurisë.
Vetëm në muajin shkurt 2026 janë regjistruar 97 aksidente rrugore, ku 125 persona kanë mbetur të plagosur apo kanë humbur jetën . Një shifër që, edhe pse në letër mund të duket statistikë, në realitet përkthehet në një alarm të përditshëm për çdo qytetar që del në rrugë.
Edhe pse në krahasim me një vit më parë raporti tregon një ulje prej 9.4% të aksidenteve për periudhën janar-shkurt, kjo nuk e zbut aspak situatën. Aksidentet vazhdojnë të jenë të shumta, të rënda dhe në pjesën më të madhe të shmangshme.
Shifra më tronditëse lidhet me shkakun: plot 86.6% e aksidenteve ndodhin për shkak të sjelljes së drejtuesve të mjeteve. Nё Shqipёri nuk kemi të bëjmë thjesht me rrugë problematike apo kushte të këqija, por me një kulturë të rrezikshme drejtimi, ku shpejtësia, pakujdesia dhe mosrespektimi i rregullave janë kthyer në normë.
Të dhënat tregojnë gjithashtu se më të rrezikuarit janë të rinjtë. Grupmosha 25–34 vjeç përbën 27.8% të aksidenteve totale, duke e kthyer këtë kategori në më të ekspozuarën ndaj rrezikut.
Aksidentet nuk janë të shpërndara rastësisht. Dita më e rrezikshme rezulton të jetë e shtuna, me 21.6% të aksidenteve, ndërsa orari më kritik është mes 08:00 dhe 12:00, kur ndodh 22.7% e tyre. Pra, pikërisht në momentet kur rrugët janë më të ngarkuara dhe qytetarët janë në lëvizje për tё pёrmbushur detyrimet e jetёs sё përditshme, rreziku është maksimal.
Ndërkohë, Tirana vijon të mbajë peshën kryesore të aksidenteve, me 42 raste vetëm në shkurt, shumë më tepër se çdo qark tjetër. Kjo e bën kryeqytetin jo vetëm qendër ekonomike dhe administrative, por edhe pikën më të nxehtë të rrezikut rrugor.
Rrugët në Shqipëri nuk janë ende të sigurta. Dhe ndërsa çdo muaj publikohen shifra, realiteti mbetet i pandryshuar – aksidentet vazhdojnë, njerëzit lëndohen dhe sistemi reagon më shumë me raporte sesa me zgjidhje konkrete.
(Burimi: INSTAT)
