Kuvendi mblidhet sot në seancë plenare me një rend dite të ngarkuar, ku përveç procedurave rutinë, në qendër pritet të jenë interpelancat dhe disa projektligje me ndikim të drejtpërdrejtë në politikat ekonomike dhe investimet strategjike.
Një nga pikat kryesore është interpelanca me Kryeministrin Edi Rama, kërkuar nga deputetja Jorida Tabaku, e fokusuar te Korporata e Investimeve Shqiptare. Megjithatë, mënyra si është formuluar kërkesa e bën atë më shumë një lëvizje formale sesa një përballje reale politike, në një moment kur vetë aktiviteti i korporatës dhe projektet që ajo shtyn përpara janë ndër më të kontestuarat.
Paralelisht, në seancë zhvillohet edhe një interpelancë urgjente me Ministrin e Brendshëm Besfort Lamallari, ku opozita ngre akuza për depërtim të krimit të organizuar në strukturat e policisë, duke u mbështetur edhe në raporte ndërkombëtare dhe raste konkrete të evidentuara së fundmi.
Por debati më i fortë pritet të lidhet me ndryshimet në ligjin për parqet teknologjike dhe shkencore, të cilat hapin rrugën për modele bashkëpunimi më të zgjeruara e njёkohёsisht mё pak tё kontrolluara mes shtetit dhe privatit. Sipas projektligjit, krijohen mekanizma të rinj si marrëveshjet për produkte inovative dhe bashkëpronësitë mes institucioneve publike dhe zhvilluesve, duke përfshirë edhe mundësinë që entet publike të kenë aksione në këto struktura.
Në të njëjtën kohë, ligji parashikon lehtësi fiskale dhe trajtim preferencial për aktivitetet që zhvillohen në këto parqe, përfshirë edhe përjashtime nga TVSH për produkte dhe shërbime inovative në kushte të caktuara.
Këto ndryshime lidhen drejtpërdrejt me projekte konkrete si “Durana”, e ndjekur po nga Korporata e Investimeve Shqiptare, dhe për këtë arsye ёshtё parë nga opozita si një tentativë për të krijuar një kornizë ligjore të përshtatur për projekte të caktuara, me shmangie tatimore, me më pak filtra dhe kontroll publik.
Në rend dite është edhe zgjedhja e një anëtari të Komisionit të Konkurrencës, ku janë paraqitur disa kandidatura, por qё rezultati dihet – rikonfirmimi i Denar Bibёs, i vёnё formalisht nё votim me Eldian Ballёn.
Në të njëjtën linjë, pritet të kalojë edhe emërimi i Diana Dervishit, bashkёshortes sё Besnik Dervishit në Kёshillin Drejtues tё AKEP, në një proces që tradicionalisht ёshtё zhvilluar pa asnjё debat publik apo transparencё.
