Institucionet kryesore të Bashkimit Europian kanë vendosur të ndalojnë përdorimin e imazheve dhe videove të krijuara tërësisht nga inteligjenca artificiale në komunikimet e tyre zyrtare, në një përpjekje për të mbrojtur besueshmërinë dhe besimin e publikut.
Vendimi është marrë nga Komisioni Europian, Parlamenti Europian dhe Kёshilli Europian, të cilёt kanë theksuar se materialet vizuale të shpërndara për publikun dhe median duhet të jenë autentike dhe jo tërësisht të gjeneruara nga AI.
“Pamjet dhe fotografitë që përdorim nuk përfshijnë përmbajtje të krijuar nga AI,” deklaroi Thomas Regnier, duke nënvizuar se autenticiteti mbetet prioritet.
Megjithatë, përdorimi i inteligjencës artificiale nuk ndalohet plotësisht. Institucioneve u lejohet përdorimi i saj për përmirësimin e materialeve ekzistuese – si rritja e cilësisë së imazheve – por jo krijimin nga zero të përmbajtjeve vizuale.
Ky vendim vjen në një moment kur mediat sintetike po bëhen gjithnjë e më të avancuara, duke e bërë më të vështirë dallimin mes përmbajtjes reale dhe asaj të manipuluar.
Ekspertët vlerësojnë se kjo qasje është e kujdesshme dhe e justifikuar, por paralajmërojnë se mund të kufizojë fleksibilitetin e institucioneve në një realitet dixhital që lëviz shumë shpejt.
Vendimi lidhet edhe me hetimet e fundit të Komisionit Evropian ndaj platformave teknologjike si X dhe chatbot-it Grok, në kuadër të Digital Services Act, për mënyrën si administrohet përmbajtja dhe rekomandimet online.
Pёrmes kёsaj vendimmarrjeje, Bashkimi Europian ka theksuar edhe njё herё se, në një epokë të manipulimit dixhital, autenticiteti mbetet standardi që nuk negociohet.
(Burimi: AA)
