Një familje në Britani është tronditur pasi një lodër për fёmijё e blerë në TikTok filloi papritur të fliste me një mesazh të frikshëm, duke ngritur shqetësime serioze për privatësinë dhe sigurinë e produkteve të blera online.
Aaron Green, nga Wythenshawe, bleu në tetor një lodër për nipin e tij njëvjeçar me çmimin rreth 8 paund. Produkti ishte reklamuar si “oktapod elektrik që kërcen”, me drita LED dhe muzikë. Asgjë në përshkrim nuk tregonte se lodra kishte funksion regjistrimi apo zëri.
Lodra u paketua si dhuratë për Krishtlindje dhe fillimisht gjithçka dukej normale: ndizte dritat dhe luante muzikë. Por disa javë më vonë, motra e Aaronit i dërgoi një video shqetësuese. Në të, lodra dëgjohej qartë duke thënë:
“Audio live po transmetohet tani në qendrën e të dhënave për analizë.”
Më pas, sipas familjes, lodra vazhdoi të nxirrte edhe fraza të tjera të pakuptueshme me të njëjtin zë elektronik.
“Ishte vërtet rrëqethëse. Nuk prisja kurrë që një lodër kaq e lirë të fliste për ‘transmetim audio’. Edhe nëse nuk regjistron realisht, fakti që thotë këtë është shqetësues,” tha Aaron.
Ai shtoi se familja ka vendosur të mos e përdorë më lodrën me fëmijën, ndërsa vetë ka nisur të kërkojë informacion për prodhuesin, i cili rezulton të jetë një fabrikë lodrash në Kinë.
Pas publikimit të rastit, TikTok konfirmoi se po heton produktin dhe e ka hequr menjëherë nga platforma. Aktualisht, faqja e produktit nuk është më e aksesueshme në rajonin britanik. Platforma deklaroi se siguria e përdoruesve është prioritet dhe se ka mekanizma verifikimi për shitësit dhe produket.
Ende nuk është konfirmuar nëse lodra kishte realisht aftësi për të regjistruar ose transmetuar audio, por rasti ka ndezur debat të gjerë mbi rreziqet e lodrave inteligjente të lira të blera online.
“Duhet më shumë kujdes kur blejmë produkte në internet, sidomos për fëmijë. Nuk tё shkon kurrë mendja se një lodër kaq e lirё mund të bëjë diçka të tillë,” tha Aaron.
(Burimi: Manchester Evening News / Mirror)
