Nga shpenzimet me karta krediti të institucioneve publike për hotele, udhëtime dhe argëtim, te përdorimi i parave të fushatave dhe lidhjet e politikanëve me organizata që përfitojnë fonde shtetërore, një seri rastesh në Shtetet e Bashkuara po ngre pikëpyetje për mënyrën se si administrohen paratë publike dhe sa lehtë mund të mjegullohet kufiri mes detyrës publike dhe interesit personal.
Një prej rasteve më të bujshme vjen nga Fayette County, Kentucky, ku vitin e kaluar senatorja republikane Lindsey Tichenor, gjatë një seance dëgjimore, lexoi një listë të gjatë shpenzimesh të kryera nga drejtues të sistemit shkollor publik: hotele, akullore, bileta për shfaqje muzikore, fluturime në klasin e parë dhe një udhëtim deri në Australi.
Zyrtarë të distriktit shkollor, të pajisur me karta krediti të institucionit, kishin kryer shpenzime që arrinin në qindra mijëra dollarë në muaj, ndërkohë që vetë Fayette County Public Schools paralajmëronte se po përballej me mungesë parash dhe kishte nevojë për më shumë të ardhura.
I pyetur për shpenzimet e tij, drejtuesi i distriktit e justifikoi një udhëtim deri në Australi duke thënë se kishte shkuar së bashku me disa punonjës për të studiuar praktikat më të mira në botë për trajtimin e nxënësve që përballeshin me kriza emocionale.
Çështja vazhdoi edhe pas seancës parlamentare. Një vit më vonë, ajo mbetet pjesë e proceseve ligjore dhe hetimeve, ndërsa ish-drejtuesi i distriktit është përfshirë edhe në një tjetër episod, pasi raportohet se kishte ecur nëpër selinë e institucionit duke lënë nën dyert e kritikëve të tij të brendshëm mesazhe që nënkuptonin mundësinë e veprimeve ligjore.
Raste të tjera vijnë nga Kalifornia, ku demokratët kanë shumicë të cilësuar në të dyja dhomat e legjislaturës. Vëmendje tërhoqi këtë vit republikani Heath Flora, në atë kohë drejtues i pakicës në Asamblenë e Kalifornisë, pasi mbështeti dy masa fiskale të demokratëve, megjithëse këta të fundit kishin votat e nevojshme për t’i miratuar edhe pa mbështetjen e tij.
Më pas ndaj Florës dolën pretendime se kishte përdorur paratë e fushatës për të financuar një marrëdhënie jashtëmartesore. Ai gjithashtu akuzohet se ka shpenzuar 11.500 dollarë nga fondet e fushatës në një lokal në East Sacramento.
Në një tjetër rast, komisioneri i Sigurimeve i Kalifornisë, Ricardo Lara, është vënë nën kritika për udhëtimet e shumta jashtë vendit. Sipas të dhënave të publikuara, ai ka kryer të paktën 32 udhëtime në 23 vende dhe territore, duke kaluar më shumë se 163 ditë jashtë vendit gjatë kohës së punës për shtetin. Lara ka kundërshtuar akuzat për shpenzime të papërshtatshme, duke deklaruar se pretendime të tilla e cenojnë atë si individ.
Një tjetër çështje lidhet me marrëdhënien mes politikës dhe organizatave jofitimprurëse që mbështeten me financime publike.
Anëtari i Asamblesë së Kalifornisë, Corey Jackson, kishte themeluar përpara hyrjes në legjislaturë organizatën Center Against Racism and Trauma (CART). Pasi u bë ligjvënës, Jackson votoi për një buxhet që financonte edhe këtë organizatë, duke ngritur pikëpyetje mbi lidhjen mes funksionit të tij publik dhe organizatës që kishte themeluar.
Rastet vijnë në një kohë kur institucione të ndryshme amerikane përballen me presion financiar, borxhe dhe debate për rritjen e të ardhurave publike, ndërsa paralelisht dalin në dritë shpenzime dhe praktika që ushqejnë kritikat për klientelizëm, konflikt interesi dhe përdorim të parave publike për përfitime që nuk lidhen drejtpërdrejt me interesin e qytetarëve.
Ndërsa qytetarët shohin dobësimin financiar të institucioneve dhe pyesin se si po ndodh, ata që akuzohen se kontribuojnë në këtë situatë vazhdojnë të shpenzojnë të qetë paratë e të tjerëve.
Burimi: The Federalist
