Qeveria britanike ka autorizuar zyrtarisht importin e naftës diesel dhe karburantit për avionë të prodhuar nga nafta ruse në vende të treta, duke shënuar një ndryshim të rëndësishëm në regjimin e sanksioneve ndaj Moskës.
Sipas një licence të publikuar nga Departamenti britanik për Biznesin dhe Tregtinë, Mbretëria e Bashkuar do të lejojë hyrjen në tregun britanik të produkteve të rafinuara jashtë Rusisë, edhe nëse lënda e parë është naftë bruto ruse.
Dokumenti specifikon se përjashtimi përfshin diesel-in dhe karburantin ajror, të cilat deri më tani ishin të ndaluara në kuadër të sanksioneve energjetike ndaj Kremlinit.
Masa hyn në fuqi më 20 maj dhe është me afat të pacaktuar.
Vendimi vjen në një moment kur tregjet globale të energjisë vijojnë të përballen me tensione të forta për shkak të luftës në Lindjen e Mesme dhe luhatjeve të çmimeve të naftës.
Praktikisht, kjo do të thotë se nafta ruse mund të përpunohet në vende të tjera dhe më pas produktet e saj të eksportohen ligjërisht drejt Britanisë.
Kritikët e kësaj lëvizjeje argumentojnë se masa krijon një “derë të pasme” për energjinë ruse në tregun britanik, pavarësisht sanksioneve të vendosura pas pushtimit të Ukrainës.
