Protesta e Flamingove shënoi këtë të shtunë një nga tubimet më domethënëse të deritanishme, me pjesëmarrjen e qytetarëve të ardhur nga vende të ndryshme të Europës, të cilët iu bashkuan protestuesve në Tiranë.
Prania e diasporës i dha protestës një dimension tjetër, duke treguar se pakënaqësia nuk kufizohet vetëm brenda territorit të Shqipërisë.
Tubimi përkoi me ditëlindjen e Kryeministrit Edi Rama, ndërsa protestuesit zgjodhën ta shënonin me një performancë simbolike. Në bulevard u soll një “tortë” prej betoni, si metaforë për atë që ata e cilësuan si modelin e betonizimit të vendit, ndërsa nuk munguan edhe thirrjet ironike “Edhe 100 vite… në burg”.
Pamjet e protestës treguan një bulevard të mbushur me flamuj kuqezi, ku spikati pjesëmarrja e shqiptarëve të ardhur nga jashtë vendit. Për organizatorët, ky ishte një sinjal se lëvizja po fiton mbështetje edhe te diaspora, e cila zgjodhi të kalojë fundjavën në Tiranë për t’u bërë pjesë e protestës, në vend që ta ndiqte atë nga larg.
Protesta e ditës së sotme tregoi se, për shumë prej tyre, distanca nuk është më pengesë për t’u përfshirë drejtpërdrejt në zhvillimet politike në Shqipëri.
