Nick Reiner, djali i tretë i regjisorit të njohur Rob Reiner, pretrendon pafajёsi ndaj akuzave për vrasjen e prindërve të tij, të cilët u gjetën të pajetë në shtëpinë e tyre në Brentwood, Los Angeles, më 14 dhjetor.
32-vjeçari u paraqit në gjykatë i shoqëruar nga një avokat publik, pasi ekipi i tij fillestar ligjor u tërhoq nga çështja. Ai ishte i veshur me një kostum ngjyrë kafe dhe me flokët e rruar. Para fillimit të seancës, Reiner foli shkurt me avokatin e tij dhe më pas iu përgjigj me një “po” të vetme pyetjes së gjyqtarit për pranimin e deklaratës së pafajësisë.
Reiner përballet me akuza për vrasje të rëndë të shkallës së parë për vdekjen e prindërve të tij, të cilët sipas hetimeve u gjetën me plagë thike. Nëse shpallet fajtor, ai rrezikon dënim me vdekje ose burgim të përjetshëm pa mundësi lirimi me kusht.
Ai është mbajtur në paraburgim pa të drejtë lirimi që nga arrestimi, i cili ndodhi vetëm disa orë pas zbulimit të trupave në rezidencën familjare në lagjen prestigjioze Brentwood.
Seanca e së martës ishte shtyrë nga janari, pasi avokati kryesor i mbrojtjes, Alan Jackson, u tërhoq nga përfaqësimi i tij. Në paraqitjen e parë në dhjetor, Reiner ishte shfaqur në gjykatë me veshje të posaçme për parandalimin e vetëvrasjeve, por këtë herë ai u paraqit pa to.
Deklarimi i pafajësisë në këtë fazë konsiderohet procedurë standarde në sistemin penal amerikan dhe nuk përjashton ndryshime të mundshme në strategjinë e mbrojtjes gjatë procesit gjyqësor që pritet të zhvillohet në muajt në vijim.
(Burimi: ANSA)
