Presidenti amerikan Donald Trump ka përshkallëzuar ndjeshëm retorikën ndaj Iranit, duke paralajmëruar se “një qytetërim i tërë mund të zhduket brenda natës”, në një nga deklaratat më të forta që prej nisjes së konfliktit.
Kërcënimi vjen në prag të afatit të vendosur nga vetë Trump për rihapjen e plotë të Ngushticës së Hormuzit, një arterie jetike për tregtinë globale të naftës dhe gazit. Ndërkohë, vetëm pak orë para këtij afati, situata në terren vijon të përkeqësohet.
Nga ana tjetër, Garda Revolucionare e Iranit ka paralajmëruar se do të përgjigjet jo vetëm në rajon, por edhe më gjerë, duke kërcënuar se do t’u ndërpresë SHBA-së dhe aleatëve furnizimin me energji për vite me radhë nëse preken objektiva civile.
Në zhvillimet e fundit në terren, një sulm ka goditur një urë hekurudhore në Kashan të Iranit, duke shkaktuar të paktën dy viktima, ndërsa më herët Izraeli kishte paralajmëruar civilët të shmangnin rrjetin hekurudhor për shkak të rrezikut të sulmeve.
Ndërkohë, Trump ka pranuar se përgjigjja e Iranit ndaj propozimit amerikan për armëpushim është “domethënëse”, por “jo e mjaftueshme”, duke lënë të hapur mundësinë e një përshkallëzimi të mëtejshëm ushtarak.
Konflikti, që tashmë ka hyrë në një fazë kritike, po rrit frikën për pasoja shumë më të gjera, jo vetëm për rajonin, por edhe për stabilitetin global, sidomos në tregjet e energjisë dhe sigurinë ndërkombëtare.
Statusi i plotë i Trump në Truth Social:
“Një qytetërim i tërë do të zhduket sonte, për të mos u kthyer më kurrë. Nuk dua që kjo të ndodhë, por ndoshta do të ndodhë. Megjithatë, tani që kemi një ndryshim të plotë dhe total të regjimit, ku mendje të ndryshme, më të mençura dhe më pak të radikalizuara do të mbizotërojnë, ndoshta diçka jashtëzakonisht e mrekullueshme mund të ndodhë – kush e di? Do ta zbulojmë sonte, në një nga momentet më të rëndësishme në historinë e gjatë dhe komplekse të botës. 47 vite shantazh, korrupsion dhe vdekje do të marrin fund. Zoti i bekoftë njerëzit e mrekullueshëm të Iranit!”
